“Ан-Насср”нинг португалиялик ҳужумчиси Криштиану Роналду ижтимоий тармоқлардаги обуначилари сони 1 миллиардга етганини маълум қилди. У тарихда биринчи бўлиб бу натижага эришди.
-vLCBX66Q.jpg)
“Биз тарих яратдик — 1 миллиард обуначи! Бу шунчаки рақам эмас — бу бизнинг умумий иштиёқимиз, ўйинга ва ундан ташқаридаги муҳаббатимиздан далолат беради.
Мадейра кўчаларидан тортиб, дунёдаги энг катта майдонларигача мен ҳар доим оилам ва сиз учун ўйнаганман ва ҳозир биз 1 миллиардмиз. Менга ишонганингиз, қўллаб-қувватлаганингиз ва ҳаётимнинг бир қисми бўлганингиз учун ташаккур. Энг яхшилари ҳали олдинда, биз биргаликда ғалаба қозонамиз ва тарих ёзамиз”, деб ёзди Роналду ижтимоий тармоғидаги саҳифасида.
Футболчининг мухлислари уни асосан Instagram ижтимоий орқали кузатади. Ушбу ижтимоий тармоқ орқали кузатувчилар сони бўйича ҳам португалиялик етакчилардан: 638 миллион киши футболчининг саҳифасига обуна бўлган.
Роналдунинг Саудия клуби билан амалдаги шартномаси 2025 йилнинг ёзига қадар мўлжалланган. Футболчининг трансфер қиймати 15 миллион еврога баҳоланмоқда. Бу мавсумда португалиялик ҳужумчи барча турнирларда тўртта ўйинда қатнашиб, тўртта гол ва иккита голли узатмани амалга оширди.
Криштиану Роналду 2 ой олдин YouTube’да ўз каналини очди ва қисқа вақт ичида бир нечта рекордларни қайд этди. Ушбу канални ҳозирда 60 миллиондан ортиқ киши кузатади.
Роналду 2025 йил февралида 40 ёшга тўлади, у беш карра “Олтин тўп” соҳиби ва жаҳон футболи тарихидаги расмий ўйинлардаги энг яхши тўпурар ҳисобланади. Португалиялик футболчи 900-голга эришган биринчи футболчи бўлди.
Изоҳ (0)