Туркия президенти Ражаб Тоййиб Эрдўғон Озарбайжонда бўлиб ўтадиган Туркий давлатлар ташкилоти саммитидаги иштирокини бекор қилди.
Маълум бўлишича, у 6 июль куни Берлинда бўлиб ўтадиган Туркия ва Нидерландия терма жамоалари ўртасидаги футбол бўйича Европа чемпионатининг чорак финал ўйинига шахсан ташриф буюриш ниятида.
ОАВга кўра, мазкур қарор Туркия терма жамоаси футболчиси Мериҳ Демирал билан боғлиқ можарога ҳам алоқадор бўлиб, унга нисбатан Европа футбол уюшмалари иттифоқи (UEFA) тергов бошлаган. Бунга футболчининг турк миллатчиларининг “Кулранг бўрилар” ҳаракатига ишораси сабаб бўлгани айтилмоқда.
Телеканалнинг қайд этишича, Эрдўғон Германияга ушбу воқеадан кейин “турк фуқароларининг руҳиятини кўтариш ва улар билан бирга эканлигини билдириш” учун ташриф буюради. Туркия президентининг режалари ҳақида ҳозирча расмий баёнотлар берилмаган.
Аввалроқ Туркия ТИВ Германиянинг Анқарадаги элчиси Юрген Шулсни UEFA томонидан Демиралга нисбатан бошланган интизомий текширув туфайли чақиртирган эди. Туркия ТИВ UEFA томонидан олиб борилган ушбу терговга йўл қўйилмаслигини эълон қилган ва Германия расмийларининг бунга муносабатини “сиёсий ва ксенофобик” деб атаган.
Изоҳ (0)