АҚШ собиқ президенти ва айни пайтда президентликка фаол даъвогар Дональд Трамп 2 июнь куни TikTok ижтимоий тармоғида рўйхатдан ўтган ва 1 суткадан камроқ муддатда 4 миллионга яқин обуначига эга бўлган. Бу ҳақда Reuters хабар берди.
Республикачилар партиясидан президентликка номзод Дональд Трамп жуда оз муддатда TikTok’да катта аудитория шакллантиришга эришган. Таҳлилчилар ушбу ҳолат унинг сайлов кампанияси учун катта фойда олиб келиши ҳақида фикр билдиришган.
АҚШ президенти бўлган пайтида Трамп TikTok’ни мамлакат ҳудудида тақиқлашнинг фаол тарғиботчиларидан бири бўлган. Бу платформа миллий хавфсизликка таҳдид эканини бир неча бор таъкидлаган.
TikTok’ка қарши ҳаракатнинг фаолларидан бири, АҚШнинг ҳозирги президенти Жо Байден ҳам платформада сайлов кампанияси мазмунини акс эттирувчи видеолари билан 340 мингдан ортиқ обуначи йиға олган. Бугунги кунда Қўшма Штатларда TikTok платформаси фойдаланувчилари сони 170 миллионни ташкил этади.
Дональд Трамп шанба куни кечқурун @realdonaldtrump манзилига эга бўлган TikTok аккаунтида сайлов кампанияси видеосини жойлаган. Ушбу видео ҳозирга қадар 64 миллиондан кўпроқ кўрилган. Видеода Нью Жерси штатининг Ньюарк шаҳрида UFC мусобақалари залида Трампнинг фуқаролар билан кўришгани акс этган.
“Америка халқи билан тўғридан тўғри мулоқот қилиш учун барча воситалардан фойдаланаман”, — деган Дональд Трамп янги ижтимоий тармоқдаги аккаунти ҳақида фикр билдириб.
Изоҳ (0)