Россияда фаолият юритувчи мухбир ва терговчи журналистлар “Проект” лойиҳаси доирасида Россия президенти Владимир Путин ва Алина Кабаева бирга яшаши ва Кипрдаги “жамғармаси”дан пул ишлатиши ҳақида суриштирув материали эълон қилди.
Суриштирувга кўра, Путин ва россиялик собиқ гимнастикачи, Миллий медиа гуруҳи директорлар кенгаши раҳбари Алина Кабаева кўпинча Валдайдаги қароргоҳда бирга яшайди. Ҳашаматли кўчмас мулкни сотиб олиш учун Путиннинг Кипрда “яширинган маблағлари”дан фойдаланилган. “Проект” лойиҳасининг биринчи қисмида Путин учун муҳим бўлган корхоналар улуши Кипрнинг Ermirа Consultants компаниясига ўтказилганини ҳақида маълумот берилади. Журналистлар президентнинг энг яқин дўстларидан бирининг собиқ бизнес-менежери билан учрашган. Унинг махфий молиявий тармоқни бошқаришда алоқаси бор, тармоқ ичига Ermirа ҳам киради.
Суҳбатдошнинг айтишича, 2015 йилгача компания петербурглик ҳуқуқшунос Владислав Копиловга тегишли эди. Лекин Ermirа’нинг ҳисоблари Путин ва унинг қариндошлари хариди учун йўналтирилган. Бу пулга квартира ва уйлар ҳам сотиб олган.
“Проект”нинг иккинчи қисмида Путин ва Кабаеванинг ҳаёти тасвирланган, журналистлар улар бирга яшашини маълум қилган. Гимнастикачининг ёрдамчилари ва қариндош опалари доимий равишда Путиннинг Валдайдаги қароргоҳига ташриф буюради ва опа-сингиллардан бирининг қароргоҳ яқинида турар жойи бор. Валдайдаги қароргоҳ ҳудудида Кабаева ва болалар учун алоҳида ёғоч уй қурилган. Кабаева учун сарой ёнида алоҳида уй борлиги қайд этилган. 2021 йилда Кабаеванинг уйи ёнида қайиқ учун тўхташ жойи қурилган, у орқали канал бўйлаб сузиш ва 28 гектарлик паркка бориш мумкин. Қароргоҳ қонун билан ҳимояланган Валдай миллий боғи ҳудудини ўз ичига олади.
Бироқ 2018 йилда Путин учун яширин темир йўл қурилган, у орқали Россия раҳбари қароргоҳга келади. “Проект” бунинг учун Россия президенти зирҳли поездидан ҳам фойдаланиши мумкинлигини маълум қилди.
Кабаева ва унинг оиласи камида 120 миллион долларлик кўчмас мулкдан фойдаланади. Путин саройларидаги қўшимча бинолардан ташқари Кабаева Россиядаги энг йирик пентҳаусга эга. У Сочидаги “Королевский парк” турар-жой мажмуасида жойлашган ва Путиннинг Кипрдаги умумий жамғармаси маблағлари эвазига сотиб олинган. Пентҳаус майдони 2600 квадрат метрни ташкил этади, унда бассейн, кинотеатр, веранда ва шахсий вертолёт майдончаси мавжуд бўлиб, дизайн Валентин Юдашкин томонидан ишлаб чиқилган.
2021 йилда бу турар жой “Россиядаги энг катта квартира” деб топилган. 2011 йилда россиялик медиаменежер Олег Руднов квартирани ўзига расмийлаштирган, кейинчалик мулк унинг ўғли Сергейга ўтказилган. 2000 йилларда айнан Руднов Санкт-Петербургдаги мулкни россиялик миллионер Светлана Крибоногихга топширган. Нашр манбасининг таъкидлашича, квартира Кабаева учун махсус сотиб олинган, бу турар жой мажмуасининг юқори қаватларидаги пентҳаусга туташган иккита квартира Кабаеванинг бувиси Анна Зацепилина номига рўйхатдан ўтгани билан тасдиқлаш мумкин.
Изоҳ (0)