Britaniyalik ayol eriga giyohvand moddalar sotib olish uchun ish joyidan 260 ming dollar o‘g‘irladi. Bu haqda Daily Mail xabar bermoqda.
Ma’lum qilinishicha, 16 yil davomida kompaniyaning bosh g‘aznachisi bo‘lib ishlagan Reychel Uilson lavozimidan foydalanib, firibgarlik sxemasini tashkil etgan. U umumiy qiymati 260 ming dollardan ortiq bo‘lgan soxta to‘lovlarni tashqi maslahatchilarga rasmiylashtirib, shuningdek, go‘yo ofis ehtiyojlari uchun mo‘ljallangan cheklarni qalbakilashtirgan.
Sud ma’lumotlariga ko‘ra, ayol mablag‘larni o‘zlashtirishni 2020-yil aprelida boshlagan. Qalloblik 2024-yil avgustida fosh bo‘lgan, chunki ta’til paytida uning o‘rnini vaqtincha egallagan hamkasbi moliyaviy hisobotlardagi nomuvofiqliklarni payqab qolgan. Ichki tergovdan so‘ng Uilson qilmishini tan olgan va keyinchalik politsiyaga to‘liq ko‘rsatma bergan. U erining giyohvand moddalarga qaramligini moliyalashtirish uchun umidsizlikdan shunday yo‘l tutganini tushuntirgan.
Liverpul qirollik sudidagi jarayonda Uilsonning himoyachisi uning chin ko‘ngildan pushaymon ekanligini, ilgari sudlanmaganligini va o‘g‘irlangan pullar hashamatli hayot kechirish uchun sarflanmaganligini ta’kidlagan. Shuningdek, ayolning kognitiv xulq-atvor terapiyasi kursini o‘tagani hamda xavotirli buzilishlar va depressiyadan davolanganini qayd etgan.
Biroq sudya Mark Eynsvort o‘g‘rilikning ko‘lami va ishonchni suiiste’mol qilish haqiqiy jazoni talab qilishini ta’kidlagan. U Uilsonning vaziyati og‘ir bo‘lsa-da, uning xatti-harakatlari oqibatlari korxona va begunoh odamlarga, jumladan, uning farzandlariga jiddiy ta’sir ko‘rsatganini aytgan.
Reychel Uilson xizmat mavqeyidan foydalangan holda firibgarlik qilganligining bitta holatida aybini tan olgan. Natijada sud britaniyalik ayolni ikki yil muddatga ozodlikdan mahrum etishga hukm qilgan.
Izoh (0)