AQSH va Buyuk Britaniya G7 sammitida avtomobillar bojlarini pasaytirish to‘g‘risida rasmiy farmon imzoladi. Bu haqda BBC xabar berdi.
Ushbu farmon bilan may oyida tuzilgan ikki davlat o‘rtasidagi tariflar bo‘yicha kelishuvning bir qismi kuchga kiradi. Kanadada bo‘lib o‘tgan G7 sammitida so‘zga chiqqan Buyuk Britaniya bosh vaziri Kir Starmer sammitni ikki davlat uchun “juda muhim kun” deb atadi.
Kelishuv Buyuk Britaniyaning aksariyat tovarlari, shu jumladan, avtomobillar uchun 10 foizlik yig‘imni o‘z ichiga oladi. Unga ko‘ra, AQSH may oyida kelishilgan shartlar bo‘yicha 2025-yil boshida barcha avtomobillar importiga qo‘yilgan 25 foizlik import solig‘i o‘rniga 10 foizlik tarif joriy etilib, 100 mingtagacha avtomobil AQSHga kiritiladi. Biroq ushbu farmon po‘lat savdosi tariflarini o‘z ichiga olmasligi aytilgan.
“Biz sizga bu ma’lumotni qisqa vaqt ichida taqdim etamiz”, dedi Tramp Buyuk Britaniya uchun po‘lat tariflari joriy qilinadimi, degan savolga.
Buyuk Britaniya hukumati esa asosiy po‘lat mahsulotlariga tariflar olib tashlanmagunicha Shtatlar bilan muzokara olib borishini bildirgan. AQSH—Buyuk Britaniya bojlari bo‘yicha kelishuv rasmiy e’lon qilingan kundan 7 kun o‘tib kuchga kirishi rejalashtirilgan.
Izoh (0)