Yevropada qaysi kasblar uchun eng yuqori maosh to‘lanadi?

Euronews Business nashri Buyuk Britaniya, Germaniya, Fransiya va Niderlandiyadagi eng yuqori maosh to‘lanadigan kasblar va sohalar haqida ma’lumot berdi.

Yevropada beriladigan oylik maoshlar ma’lum soha va kasbga qarab farqlanadi. Ba’zi mutaxassisliklarga bo‘lgan talab kamayib borayotgan bir vaqtda yangi kasblar ham paydo bo‘lmoqda. Sog‘liqni saqlash sohasi esa hozirga qadar eng muhimi bo‘lib qolmoqda.

Xo‘sh, Yevropada aynan qaysi kasb egalari eng yuqori daromadga ega? Euronews Business nashri Indeed platformasining ma’lumotlariga tayangan holda, eng yuqori maosh to‘lanadigan kasblar haqida ma’lumot berdi. Quyidagi tahlil to‘rtta davlat — Buyuk Britaniya, Germaniya, Fransiya va Niderlandiyani qamrab oladi. Shifokorlar va jarrohlar kasbi asosiy ro‘yxatdan chiqarib tashlangan bo‘lib, ular alohida ko‘rib chiqiladi.

1. Tibbiyot va stomatologiya eng yuqori o‘rinda

Tibbiy maslahatchilar, radiologlar, tibbiyot maskani direktorlari, ortodontlar va stomatologlar doim eng yuqori haq to‘lanadigan kasblar safidan joy olgan. Bu ayniqsa Buyuk Britaniyada yaqqol ko‘zga tashlanadi: eng yuqori haq to‘lanadigan 20 ta kasbning deyarli yarmi aynan shu sohalarga taalluqli. Fransiyada esa eng yuqori daromadli to‘rtta kasbning uchtasi tibbiyot, xususan stomatologiyaga tegishli.

2. Rahbarlik va boshqaruv lavozimlari

Ijro etuvchi direktor, strategiya direktori, loyiha direktori va texnologiyalar bo‘yicha direktor kabi rahbarlik lavozimlari yuqori maosh olmoqda. Ular savdo, bank, texnologiyalar va umumiy boshqaruv sohalarida uchraydi.

3. Texnologiya va IT mutaxassislari

Dasturiy ta’minot ishlab chiquvchilari, IT-operatsiyalar bo‘yicha mutaxassislar, masalan, dasturiy ta’minot muhandislari, SAP maslahatchilari Germaniya va Niderlandiyada yuqori maosh oladi.

4. Savdo va biznesni rivojlantirish

Savdo sohasidagi boshlang‘ich lavozimlar odatda uncha katta daromad olib kelmaydi, biroq savdo bo‘yicha direktor, bo‘lim boshlig‘i yoki mijozlar bilan ishlovchi menejer kabi lavozimlar yuqori maoshga ega. Germaniya va Niderlandiyada tajribali savdo xodimlari IT yoki rahbarlik sohasidagi mutaxassislar bilan teng maosh oladi.

5. Soliq, moliya va yuridik masalalar bo‘yicha kasblar

Soliq bo‘yicha direktor, mehnat qonunchiligi bo‘yicha yurist va moliyaviy nazoratchi kabi lavozimlar Germaniya va Buyuk Britaniyada doimo katta maosh to‘lanadigan kasblar hisoblangan. Ular qonunchilik hamda moliyaviy ekspertiza bo‘yicha chuqur bilim va ko‘nikmalarni talab qiladi.

Yevropa mehnat bozorida raqobatbardosh bo‘lish uchun nima qilish kerak?

“Jadal ravishda o‘zgarib borayotgan mehnat bozori sharoitida har bir kadr doimo o‘z ustida ishlashi zarur. Yangi vositalar, platformalar va metodlarni faol o‘zlashtirayotgan mutaxassislar yangi texnologiyalar sharoitida eng talabgir kadr hisoblanadi”, deydi Indeed’ning iqtisodiy tadqiqotlar bo‘yicha direktori Pavel Adrian.

Germaniyadagi eng yuqori maosh oladigan kasblar

Germaniyada eng yuqori yillik daromad korporativ soliq konsultantlariga to‘g‘ri keladi — 145 000 yevro.

Keyingi o‘rinlarda savdo sohasidagi rahbarlar: ijrochi direktor va savdo bo‘limi boshlig‘i — 107 500 yevrodan 138 243 yevrogacha.

Mehnat huquqi bo‘yicha yurist 105 000 yevro, advokat 93 334 yevro oladi.

SAP-konsultantlar 100 000 yevroga yaqin daromad qiladi, katta tizim muhandislarining maoshi esa 95 000 yevro atrofida.

Kiberxavfsizlik bo‘yicha mutaxassislar va SAP texnik konsultantlari 90 000 yevro atrofida daromad oladi.

Fransiyada stomatologlar yetakchi

Fransiyada stomatologlar 95 000 yevro bilan ro‘yxatda birinchilikni egallaydi, ortodontlar o‘rtacha 78 750 yevro oladi.

IT sohasidagilar 72 361 yevro, sog‘liqni saqlashdagi tibbiyot xodimlari 70 000 yevro maosh oladi.

Ishlab chiqarishda komplayens bo‘yicha mutaxassis 67 500 yevro, savdo agentlari esa 65 000 yevro atrofida daromad qiladi.

60 000 yevro daromadga ega bo‘lgan boshqa lavozimlarga ko‘chmas mulk agenti, operatsion direktor, savdo menejeri, ishlab chiqarish direktori, HR-direktori kabilar kiradi.

Sog‘liqni saqlash Buyuk Britaniyadagi eng yaxshi haq to‘lanadigan soha

Buyuk Britaniyada modellik sohasidagi top-modellar 166 390 yevro (140 000 funt sterling) yillik o‘rtacha ish haqi bilan ro‘yxatda birinchi o‘rinni egallaydi.

Ulardan keyin 145 821 yevro (111 412 funt sterling) maosh oladigan tibbiy maslahatchilar turadi. Tibbiyot direktorlari va rentgenologlar 137 566 yevro maosh olishadi.

Sog‘liqni saqlash sohasidagi boshqa yuqori maosh oluvchilar orasida ortodontlar (130 767 yevro), klinik maslahatchilar (125 392 yevro), bosh hamshiralik xodimlari (124 793 yevro) va klinik direktorlar (109 442 yevro) bor.

Stomatolog yordamchilari (116 785 yevro) va parodontlar (113 808 yevro) ham eng ko‘p maosh oladiganlar sirasiga kiradi.

Niderlandiyada boshqaruv, buxgalteriya va dasturlash yetakchi sohalar

Niderlandiyada eng yuqori maoshli kasblar boshqaruv, buxgalteriya va dasturiy ta’minot ishlab chiqish sohalaridadir.

Bosh direktorlar o‘rtacha yillik ish haqi 115 000 yevro bilan yetakchilik qiladi.

Boshqa yuqori maoshli lavozimlarga biznes nazoratchilari (80 000 yevro), jamoa rahbarlari (78 206 yevro) va muhandislar (75 208 yevro) kiradi.

Savdo va texnologiya sohalaridagi ish haqi odatda 56 500 dan 66 000 yevrogacha boradi, savdo menejeri, dasturiy ta’minot muhandisi, ma’lumotlar tahlilchisi kabilar shular jumlasidandir.

Yaxshi maosh olish uchun nufuzli universitet diplomiga ega bo‘lish shartmi?

“Nufuzli va dunyodagi top universitetda o‘qish Fransiya va Buyuk Britaniyada ishga joylashish va maosh darajasiga ta’sir qilishi mumkin”, deydi Adrian.

Uning ta’kidlashicha, grandes écoles va uzoq tarixga ega universitetlar kabi elita ta’lim muassasalari bitiruvchilari mehnat bozorida kuchli nomzod sifatida qabul qilinadi.

Kelajakdagi eng istiqbolli kasblar

Texnologiyalar va jamiyat rivojlanib borar ekan, eng yuqori maoshli kasblar ro‘yxati ham o‘zgarib boradi.

“Keyingi 5–10 yil ichida energetika, sun’iy intellekt, kiberxavfsizlik va biotexnologiyalar bilan bog‘liq kasblarga ustunlik berilishi kutilmoqda”, deydi Pavel Adrian.