Germaniyadagi Gamburg yer sudi milliarder Alisher Usmonovni “Dilbar” superyaxtasining egasi deb atashni taqiqladi. Bu haqda milliarderning matbuot xizmati xabar berdi.
Mazkur superyaxta 2022-yilda Gamburg portida hibsga olingandi. Sud ushbu yaxtaga Usmonovning aloqadorligi bo‘yicha ilgari chop etilgan maqolalarni “haqiqatga to‘g‘ri kelmaydi” deb topdi. Agar taqiq buzilsa, javobgar har bir holat uchun 250 ming yevrogacha ma’muriy jarimaga tortilishi mumkin. Agar summani undirishning imkoni bo‘lmasa, sud ma’muriy qamoq tarzidagi jazo (olti oydan ikki yilgacha) tayinlaydi.
Da’voga Luxembourg Times gazetasidagi maqola sabab bo‘lgan. Unda Alisher Usmonov yaxtaga “kompaniya va trast orqali” egalik qilishi ta’kidlangan. Biroq bu da’vo yuridik asosga ega emasligi ma’lum qilingan. Hozirda maqoladagi bahsli parcha olib tashlangan.
2023-yildan boshlab Usmonovning advokatlari Germaniyada tadbirkorga tegishli mulk borligini yozgan boshqa nashriyotlarga nisbatan ham o‘nta sud qarori va taqiqiga erishgan. Milliarderning vakillari bu mulklar qaytarib olinmaydigan trastlarda ekanini va ularning boshqaruvchilariga tegishli ekanini isbotlagan.
Ularning huquqiy asossizligiga, shuningdek, maqola qismlari keyinchalik olib tashlangani yoki tuzatilganiga qaramay, bu maqolalar Yevropa Ittifoqining Usmonovga qarshi sanksiyalari to‘g‘risidagi tergov materiallari va hujjatlarida tilga olingan, deydi millarderning manfaatlarini himoya qiluvchi mediayurist Yoaxim Shtaynxefel.
Huquqshunosning so‘zlariga ko‘ra, “Yevropa Ittifoqi prokuraturasi va sanksiya beruvchi organlarining obro‘sizlantirilgan va sud tomonidan taqiqlangan OAV materiallariga tayanishi protsessual qonunbuzarliklar borasida jiddiy xavotir uyg‘otmoqda”.
Yevropa Ittifoqi Alisher Usmonovga qarshi sanksiyalarni 2022-yil 28-fevralda, AQSH va Britaniya o‘sha yilning 3-martida, Kanada esa11-martida kiritgan. Aprel oyida Gamburg portida Usmonovga aloqador deb qaralgan 156 metrlik “Dilbar” yaxtasi qo‘lga olingani haqida xabar paydo bo‘lgan.
Izoh (0)