Hindistonlik milliarder va Britaniya shahzodasi Uilyamning ko‘p yillik do‘sti 53 yoshli Sanjay Kapur asalari yutib yuborgach, o‘limga olib kelgan yurak xuruji tufayli vafot etdi. Bu haqda The Mirror gazetasi xabar bermoqda.
Dunyodagi yirik avtomobil ehtiyot qismlari ishlab chiqaruvchi Sona Comstar kompaniyasi raisi va tadbirkor 12-iyun kuni Angliyada bo‘lib o‘tgan polo o‘yini paytida hushidan ketgan. Kapurning og‘zini ari chaqishi anafilaktik shok va yurak to‘xtashiga sabab bo‘lgan.
Mutaxassislarning ta’kidlashicha, asalarilarning og‘izni chaqishi o‘limga olib kelishi mumkin, chunki bu tez shishish, nafas yo‘llarining tiqilishi va qon bosimining keskin tushib ketishiga sabab bo‘ladi, natijada yurak to‘xtab qoladi.
Ta’kidlanishicha, Kapurning vafoti allaqachon Britaniya yuqori doiralarida ham, Hindistonning oliy jamiyatida ham larzaga solgan. Kapur muntazam ravishda polo musobaqalarida qatnashib, Britaniya qirollik oilasi a’zolari bilan tez-tez muloqotda bo‘lardi. U butun Britaniya bo‘ylab nufuzli o‘yinlarda ishtirok etib, qirollik oilasi a’zolari, jumladan 42 yoshli Uels shahzodasi bilan o‘ynashga taklif qilinardi.
Ilgari Kapur Bollivud aktrisasi Karishma Kapurga uylangan bo‘lib, ularning Samayra va Kiaan ismli ikki farzandi bor edi. Er-xotin 13 yillik nikohdan so‘ng 2016-yilda ajrashgan. Keyinchalik tadbirkor 2017-yilda sobiq hind modeli Priya Sachdevga uylangan.
Izoh (0)