Londonda Turkiya elchixonasi yaqinida noma’lum shaxs Qur’on yoqish aksiyasini uyushtirdi, deb xabar bermoqda Daily Mail.
Uni to‘xtatish uchun yana bir erkak namoyishchiga pichoq bilan hujum qilib, kaltaklagan.
Britaniya matbuoti xabariga ko‘ra, voqea 13-fevral kuni tushdan keyin sodir bo‘lgan. Tarqalgan videolarda namoyishchi erkak yonib turgan kitobni ushlab turganini ko‘rish mumkin. Shundan so‘ng katta yoshli erkak uni tepib, yerga yiqitgach yonayotgan kitobni tortib olgan.
Ma’lum qilinishicha, hujum qilgan shaxs yonida pichoq olib yurgan va u bilan Qur’on yoquvchiga zarba bermoqchi bo‘lgan.
Qur’onni yoqqan shaxs jarohatlar bilan shifoxonaga yetkazilgan. Uning faqat barmoqlari lat yegani aniqlangan, hech qanday pichoq jarohati olmagan. Hujum qilgan erkak sovuq qurol saqlash va og‘ir tan jarohati yetkazishda gumonlanib, hibsga olingan.
Daniyaning “Qattiq kurs” partiyasi yetakchisi Rasmus Paludan 1-fevral kuni muqaddas Qur’oni karim nusxasini yana yoqib yuborgan edi.
Bu Rasmusning Qur’onni yoqishiga oid birinchi holat emas. U 2023-yil yanvar oyida Stokgolmdagi Turkiya elchixonasi oldida Qur’onni yoqib yuborgandi, bir necha kundan so‘ng Daniyadagi masjid eshigi oldida ham shunday qilgan.
O‘shanda nafaqat mahalliy hokimiyat ruxsati bilan, balki politsiya nazorati ostida ham o‘tkazilgan har ikki harakat musulmon mamlakatlarida o‘ta salbiy munosabatga sabab bo‘lgan. Turkiya hatto Shvetsiyaning NATOga a’zo bo‘lish haqidagi arizasini bloklash bilan tahdid qilgan. Biroq keyinroq Shvetsiya politsiyasi Stokgolmdagi bosh masjid yaqinida Qurbon hayitining birinchi kunida Qur’onni yoqishga ruxsat bergan.
Mazkur harakatlardan so‘ng Daniya parlamenti diniy matnlarni yoqishni taqiqlovchi qonunni qabul qilgan. Bunday harakatlar uchun ikki yilgacha ozodlikdan mahrum qilish jazosi beriladi.
Qur’onni yoqqan iroqlik erkak o‘ldirib ketildi
29-yanvar kuni Shvetsiyaning Syodertelye shahrida 2023-yilda Qur’onni bir necha bor yoqqani ortidan tanilgan iroqlik Salvan Momika otib ketildi. Erkak TikTok’da jonli efir olib borayotgan paytda hujumga uchragan. Holat yuzasidan 5 kishi hibsga olingan.
Salvan Momika 2018-yilda Iroqdan Shvetsiyaga kelgan, 2021-yilda uch yillik yashash ruxsatnomasini olgan. 2024-yil yozida uning vaqtinchalik yashash ruxsatnomasi bir yilga uzaytirilgan. Shvetsiya prokuraturasi Momikaga “nafrat qo‘zg‘atish” moddasi bo‘yicha ayblov qo‘ygan.
U 2023-yil yozida Stokgolmning to‘rt joyida Qur’onni yoqib yuborish bilan bog‘liq to‘rtta holat bo‘yicha ayblangan. Iroq Shvetsiyadan Qur’onni yoqib yuborgan fuqarosini topshirishni talab qilgan. Qur’on yoqilgani aks etgan kadrlar jinoiy qilmishlar dalili hisoblanadi. 30-yanvar kuni sud Momikaga qarshi hukm chiqarishi kerak edi. Ammo “o‘lim tasdiqlangani” tufayli sud hukmini e’lon qilish kechiktirilgan.
Izoh (0)