Britaniya allaqachon Rossiya bilan urush olib bormoqda. AQSHga endi ishonchli ittifoqchi sifatida tayanish mumkin emas, deya xabar berdi The Independent ingliz hukumati vakillaridan biriga tayanib.
Donald Trampning birinchi prezidentlik muddatida Oq uyning Rossiya bo‘yicha bosh maslahatchisi bo‘lib ishlagan Fiona Xill Buyuk Britaniya “juda katta muammoga duch kelganini” aytib, mamlakat Rossiya va AQSH o‘rtasida qolib ketganini ta’kidlagan. U Kreml yillar davomida “Buyuk Britaniyaga turli yo‘llar bilan tahdid solayotganini” ta’kidlab, “zaharlash, suiqasd, qo‘poruvchilik operatsiyalari, barcha turdagi kiberhujumlar va ta’sir o‘tkazish operatsiyalari”ni misol qilib keltirgan.
Fiona Xill, Lord Robertson va general ser Richard Barrons muallifligida hukumat “Strategik mudofaa sharhi” ishlab chiqilgan. Unda aytilishicha, Britaniya armiyasi Rossiya tahdidi va Xitoyning kuchayishi oldida “10 barobar kuchliroq” bo‘lishi kerak.
Sharhga ko‘ra, qurolli kuchlar qurol-yarog‘ zaxiralari yetarli emas, ommaviy qurbonlar to‘qnashuviga dosh bera olmaydigan tibbiy xizmat va oz sonli qo‘shin tarkibiga ega.
Buyuk Britaniya bosh vaziri Kir Starmer mamlakatni “jangga tayyor, zirhli davlat”ga aylantirishga so‘z bergandi. Rejaga ko‘ra, armiyani 100 ming kishiga yetkazish, 12 ta yangi suv osti kemasini ishga tushirish, dronlar va sun’iy intellekt tizimlarini joylashtirish ko‘zda tutilgan.
Tramp ma’muriyatini qattiq tanqid qilgan Xillning aytishicha, Britaniya endi Sovuq urush davridagidek AQSHning yordamiga avvalgidek tayana olmaydi. Oq uy haqida gapirar ekan, Xill bu “ma’muriyat emas, balki sud” ekanini ta’kidlagan. Prezident birinchi navbatda “o‘z xohish-istaklari va manfaatlarini ustun qo‘yishini” bildirgan.
Izoh (0)