Futbolchi Devid Bekhem, aktyor Gari Oldman va The Who guruhining solisti Rojer Doultriga ritsar unvoni berildi. Qirol Charlz III ning rasmiy tug‘ilgan kuni munosabati bilan davlat mukofotlari sovrindorlari ro‘yxati Buyuk Britaniya hukumati veb-saytida eʼlon qilindi.
“Manchester Yunayted” klubi va Angliya terma jamoasining 50 yoshli sobiq yarim himoyachisi sportdagi muvaffaqiyatlari va xayriya faoliyati uchun taqdirlandi. The Guardian xabariga ko‘ra, Bekhem “bunday sharafga sazovor bo‘lishini hech qachon tasavvur qilmaganini” aytdi.
“Qora kunlar”, “Sid va Nensi”, “Josus, chiqib ket!”, “Garri Potter” va boshqa filmlarda rol o‘ynagan 67 yoshli “Oskar” mukofotiga sazovor bo‘lgan aktyor Gari Oldman ham drama sanʼatiga qo‘shgan hissasi uchun unvonga sazovor bo‘ldi.
Bundan tashqari, The Who rok guruhi asoschisi Rojer Doltri musiqa hamda xayriya faoliyati uchun ham taqdirlandi. U ko‘p yillardan beri o‘smirlar saratoniga qarshi kurashish jamg‘armasiga yordam berib kelmoqda.
Jami 1200 nafar davlat arboblari mukofot va ordenlarga sazovor bo‘ldi, ular orasida 77 yoshli qo‘shiqchi va aktrisa, musiqiy filmlardagi rollari bilan mashhur bo‘lgan Eleyn Peyj, yozuvchi Pat Barker, sobiq mudofaa vaziri Penni Mordont va boshqalar bor.
Eng keksa laureat 106 yoshli vinochilar klubi asoschisi Uilyam Irvin bo‘lib, u jamiyat oldidagi xizmatlari uchun Britaniya imperiyasi ordeni medalini oldi va tug‘ma mushak distrofiyasidan aziyat chekayotgan 11 yoshli Karmela Chillery-Uotson nogironlar muammolari haqida xabardorlik bo‘yicha saʼy-harakatlari uchun Britaniya imperiyasining eng yosh ordeni sohibiga aylandi.
Britaniya imperiyasi ordeni 1917-yilda Charlz III ning bobosi qirol Jorj V tomonidan taʼsis etilgan. Mukofot besh darajaga ega: orden kavaleri, ofitser, qo‘mondon, ritsar-qo‘mondon yoki qo‘mondon xonim, shuningdek, Buyuk Xoch ritsari yoki Buyuk Xoch xonim. Faqat oxirgi ikki daraja erkaklar uchun “ser” yoki ayollar uchun “xonim” old qo‘shimchasi bilan ritsarlik unvoniga huquq beradi.
Izoh (0)