Turkiya 13-iyun kuni fuqarolar urushi sababli Turkiyaga qochib o‘tgan 273 mingdan ortiq suriyalik uyiga qaytganini ma’lum qilgan. Bu haqda Al Arabiya xabar berdi.
“2024-yil 8-dekabrdan beri Suriyaga ixtiyoriy ravishda qaytgan odamlar soni 273 mingdan oshdi”, dedi Turkiya vitse prezidenti Jevdet Yilmaz.
Ichki ishlar vazirligining may oyida e’lon qilingan ma’lumotlariga ko‘ra, 2,7 millionga yaqin suriyalik qochqin hali ham Turkiyada bo‘lib turibdi.
Suriyaning yangi hukmdorlarini qo‘llab-quvvatlayotgan Turkiya hukumati mamlakatning ba’zi qismlarida qochqinlarning mavjudligi tufayli yuzaga kelgan keskinlikni yumshatish uchun ularning qaytishini tezlashtirishga umid qilmoqda.
Oldinroq Turkiya Suriyaning markaziy qismida joylashgan Tiyas (T4) harbiy-havo bazasini nazoratga olishga harakat qilgani aytilgandi. Anqara bu yerda havo mudofaa tizimlarini joylashtirishni reja qilgandi.
Turkiya va Suriya rasmiylari 2024-yil dekabrdan buyon mudofaa shartnomasi bo‘yicha muzokaralar olib borayotgan edi. Mazkur kelishuvga binoan turklar mamlakatga harbiy yordam ko‘rsatishi, Suriya osmonini muhofaza qilishi ko‘zda tutilgandi.
Mahalliy nashrga ko‘ra, Anqara mazkur bazaga mahalliy ishlab chiqarilgan Hisar havo mudofaa tizimini joylashtirish orqali o‘z qo‘shinlari xavfsizligini ta’minlamoqchiligi aytilgan. Keyinchalik u yerga kuzatuv va jangovar dronlar ham olib kelinishi mumkinligi bildirilgandi.
Bundan tashqari, Turkiya hududda ko‘p halqali havo mudofaa tizimini joriy qilish orqali turli tahdidlarga, jumladan jangovar samolyotlar, dronlar va raketalarga qarshi kurash imkoniyatiga ega bo‘lmoqchi edi. Bu esa tabiiyki Isroilni tashvishga solayotgandi.
Izoh (0)