Ilhom Haydarov O‘zbekistonning Turkiyadagi elchisi etib tayinlandi. Bu haqda “Dunyo” axborot agentligi xabar berdi.
Ma’lum qilinishicha, u 16-iyun kuni Anqara shahriga yetib keldi. Shu kuni Turkiya Tashqi ishlar vazirligi Protokol bosh boshqarmasi boshlig‘i, elchi Ahmet Jemil Mirog‘luga ishonch yorliqlari nusxalarini topshirdi.
Muloqot davomida O‘zbekiston—Turkiya ikki tomonlama munosabatlar va xalqaro tashkilotilar doirasidagi ko‘p tomonlama hamkorlikni yanada chuqurlashtirish, turli darajadagi o‘zaro tashriflar va qo‘shma tadbirlarni tashkil etish kabi masalalar ko‘rib chiqildi. Savdo-iqtisodiy hamkorlikni rivojlantirish, ishbilarmon doiralar o‘rtasidagi aloqalarni faollashtirish, madaniy-gumanitar va turizm sohasidagi aloqalarni kengaytirish yuzasidan fikr almashildi.
Ahmet Jemil Mirog‘lu O‘zbekistonning yangi tayinlangan elchisiga Turkiyadagi diplomatik faoliyatida muvaffaqiyatlar tiladi va Istanbuldagi Tashqi iqtisodiy aloqalar kengashi (DEIK) bilan to‘g‘ridan to‘g‘ri aloqalarni yo‘lga qo‘yishga yaqindan ko‘mak ko‘rsatishga tayyorligini bildirdi.
Ilhom Haydarov haqida
56 yoshli diplomat 2024-yil iyul oyidan buyon O‘zbekiston tashqi ishlar vazirining o‘rinbosari lavozimida ishlab kelayotgan edi. U Toshkent davlat universiteti (hozirgi O‘zbekiston Milliy universiteti), Rossiya tashqi savdo akademiyasini, Memfisdagi (AQSH) Xalqaro paxta maktabini tamomlagan. O‘zbekiston Tashqi iqtisodiy aloqalar vazirligi tizimida (hozirgi Investisiyalar, sanoat va savdo vazirligi) va xorijiy vakolatxonalarda savdo-iqtisodiy maslahatchi, Ukrainadagi elchi lavozimlarida ishlagan.
2009-yildan 15 yil davomida “O‘zbekengilsanoat” davlat aksiyadorlik kompaniyasiga (hozirgi “To‘qimachilik va tikuv-trikotajsanoat” uyushmasi) rahbarlik qilgan. Shu bilan birga, 2021–2024 yillarda O‘zbekiston Ish beruvchilar konfederatsiyasi raisi sifatida ishlagan.
Ilhom Haydarov Oliy Majlis Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi etib saylangan Alisher Agzamxo‘jayev o‘rniga tayinlandi. Alisher Agzamxo‘jayev 2017—2025-yillarda O‘zbekistonning Turkiyadagi, 2018-yildan e’tiboran esa bir vaqtning o‘zida Bolgariyadagi elchisi bo‘lib ishlagan.
Izoh (0)