Yosh — bu hukm emas va ushbu turdizi yulduzlari buning yorqin isbotidir. Ular allaqachon 50 yoshdan oshgan bo‘lsa-da, hamon o‘z go‘zalligi, jozibadorligi va maftunkorligini saqlab qolgan, eng muhimi, aynan shu aktrisalar hamon juda talabgir bo‘lib kelmoqda.
- Nebahat Chehre
“Muhtasham yuz yil” seriali yulduzi 1944-yil 15-martda tug‘ilgan, ammo unga qarab, bu jozibali ayolning 81 yoshda ekanligiga ishonish qiyin. Ko‘plab turdizi yulduzlari singari, Nebahat ham kinoga modellik sohasidan kelgan. 1960-yilda u “Turkiya go‘zali” unvonini qo‘lga kiritdi va uning kinodagi debyuti 1961-yilda “Yovvoyi atirgul” filmidagi roli bilan boshlandi. Bugungi kunda mashhur aktrisaning filmografiyasi 100 ga yaqin filmni o‘z ichiga oladi. To‘g‘ri, so‘nggi yillarda aktrisa suratga tushmayapti — avvaliga u koronavirus pandemiyasi tufayli ishidan voz kechdi, keyinchalik esa sog‘lig‘ida muammolar paydo bo‘ldi va 2024-yil may oyida hatto shoshilinch ravishda jarrohlik amaliyotini boshdan kechirdi. Hozirda Nebahatning sog‘lig‘i hech qanday xavotir uyg‘otmayapti.
Turk aktrisasi ikki marta turmush qurgan bo‘lsa-da, shaxsiy hayotida hech qachon baxtga erisha olmagan. Farzandlari yo‘q. Suhbatlarning birida Chehre butun umrini ishga bag‘ishlaganini va bundan afsuslanmasligini samimiy tan olgan. Nebaxat Chehre “Iflos pullar va muhabbat”, “Iyun oqshomi”, “Menejerimga qo‘ng‘iroq qiling”, “Uyimdagi dushman”, “Qonli yanvar” va boshqa ko‘plab mashhur filmlarda ham rol ijro etgan.
- Nursel Ko‘se
Nursel Ko‘se turdizining eng yorqin va rang-barang yulduzlaridan biri hisoblanadi. U 1961-yil 29-martda tug‘ilgan. 64 yoshli mashhur aktrisa hech qachon o‘z yoshini yashirmagan, aksincha u yashab o‘tgan yillar soni bilan faxrlanish kerak, deb hisoblaydi, chunki yoshlik hammaga berilgan, keksalik esa faqat tanlanganlarga nasib etadi. Turdizi yulduzi ijodkor oilada voyaga yetgan, ammo voyaga yetgach, ota-onasi uni Germaniyaga yuborgan. U yerda Kyoln universitetida arxitektura yo‘nalishida tahsil olgan va hatto diplom olgach, bir necha yil davomida o‘z mutaxassisligi bo‘yicha ishlagan. Biroq sanʼatga bo‘lgan ishtiyoq ustun kelgan.
Yoshligidanoq Nursel sheʼrlar va pyesalar matnlarini yozgan va aynan u “Pol kosmetologlari” nomli ayollar guruhiga asos solgan. Aktrisa kinodagi ilk rolini 1988-yilda “Yasemin” nomli turk-nemis filmida ijro etgan. Bugungi kunda Ko‘sening filmografiyasi 50 dan ortiq loyihani o‘z ichiga oladi. U “Uzoq shahar”, “Uch qurush”, “Parchalangan”, “Boshlanuvchilar uchun turk tili”, “Qora tut”, “Bezori”, “Hovli” va boshqa ko‘plab mashhur filmlarda suratga tushgan.
Aktrisa Ulrix Mertin bilan turmush qurgan. Ular 2018-yilda rasman nikohdan o‘tishgan, lekin bunga qadar 14 yil davomida munosabatlarini rasmiylashtirmasdan birga yashashgan. Nursel Ko‘se va uning turmush o‘rtog‘ining farzandlari yo‘q.
- Aydan Shener
Turk aktrisasi 1963-yilning 1-martida tug‘ilgan bo‘lib, unga “Choliqushi” serialidagi Feride roli jahon shuhratini keltirgan. Aydan ham xuddi Nebaxat Chehre singari o‘z yo‘lini go‘zallik tanlovidan boshlagan. U 1981-yilda “Turkiya go‘zali” unvonini qo‘lga kiritgan va bir necha yildan so‘ng kinoda ham debyut qilgan. Bugungi kunga kelib Aydanning filmografiyasida 30 ga yaqin loyiha mavjud. U “Sandiq isi”, “Uch opa-singil”, “Yurak og‘rig‘i”, “Qalbimdagi Deniz”, “Biz begunoh emasmiz” va boshqa ko‘plab seriallarda rol ijro etgan. Shu bilan birga, 62 yoshli aktrisaning aksariyat rollari ikkinchi darajali bo‘lib, ko‘plab turk seriali muxlislari uchun u hamon Feride bo‘lib qolmoqda.
Aydan Shener ajrashgan. U yoshligidayoq Ayxon Aqbinga turmushga chiqqan va undan qiz farzand ko‘rgan. Biroq eri xotinining to‘ydan keyin modellik va kinematografiya sohasida ishlashni davom ettirishiga rozi bo‘lmagan. Ayxon hatto xotinini paranji yopinishga majbur qilmoqchi bo‘lgan, ammo Shener nafaqat buni rad etgan, balki ajralish uchun ariza ham bergan. U ikkinchi marta turmush qurishni istamagan.
- Aida Aksel
1962-yil 31-oktyabrda tug‘ilgan 62 yoshli Aida Aksel ilk rolini 21 yoshida olgan, biroq o‘sha paytda kinematografiya uni qiziqtirmagan. Aslida, Aida suratga olish maydoniga birinchi bor 15 yoshida qadam qo‘ygan — u reklamada suratga tushgan, keyinchalik esa teatrni butun qalbi bilan sevib qolgan. U 1994-yilda suratga tushgan “Ozodlik” serialini o‘zining to‘laqonli televizion debyuti deb hisoblaydi. Aksel hamon o‘zini birinchi navbatda teatr aktrisasi deb biladi. Uning filmografiyasi 35 ga yaqin filmni o‘z ichiga oladi va tomoshabinlar uni “Shamol”, “Ota“, “Tugun”, “Guljamol”, “Oila” va boshqa ko‘plab seriallardagi rollari bilan yodda saqlashgan.
Aida Aksel hech qachon o‘z yoshidan yosh ko‘rinishga yoki o‘ziga qiz bo‘lishi mumkin bo‘lgan qahramonlarni o‘ynashga intilmaydi. Turk aktrisasi o‘z yoshiga katta hurmat bilan qaraydi va har bir rolning o‘z vaqti borligiga chin dildan ishonadi. Aynan shu — tabiiy go‘zalligi, o‘zini qabul qilishi va isteʼdodi uchun tomoshabinlar uni qadrlaydi.
Turkiya seriali yulduzi ikki marta turmush qurgan. Uning birinchi turmush o‘rtog‘i 1984-yilda nikohdan o‘tgan muhandis Xoliq Sami Yungul edi. Ikki yildan so‘ng ularning qizi dunyoga keldi va u yetti yoshga to‘lganida er-xotin ajrashdi. 1995-yilda Aida ikkinchi marta turmush qurdi. Elektrotexnik Atilla Akinjiog‘lu uning tanlovi bo‘ldi va to‘rt yildan so‘ng Aida o‘g‘il ko‘rdi. 2010-yilda Atilla yurak xurujidan vafot etdi va uning o‘limi turkiya seriali yulduzi uchun juda og‘ir sinov bo‘ldi. Uning normal hayotga qaytishiga aynan ishi yordam berdi.
- Hulya Avshar
Hulya 1963-yilning 8-oktyabrida tug‘ilgan. 61 yoshli aktrisa butun dunyoga, avvalo, “Muhtasham asr. Ko‘sem saltanati” serialidagi Safiye Sulton obrazi bilan tanilgan. Biroq vatanida Avsharni isteʼdodli qo‘shiqchi, tajribali rejissyor, ssenariynavis va prodyuser sifatida bilishadi. Turdizi yulduzi o‘zining yoshligi va go‘zalligini saqlab qolish uchun bor kuchini sarflaydi. U kosmetologlar xizmatidan tez-tez foydalanishini va muntazam ravishda parhez tutishini hech qachon yashirmaydi. To‘g‘ri, so‘nggi yillarda Hulya kamroq kinoda suratga tushmoqda va ko‘proq vaqtini aynan sahnaga bag‘ishlamoqda. Avshar “Begunohlik“, “Ikki qiz”, “Yurak fasli”, “Agar ayol bo‘lsa”, “Zumrad” va boshqa film hamda seriallarda suratga tushgan. Umuman olganda, turdizi yulduzining filmografiyasi 60 dan ortiq loyihani o‘z ichiga oladi.
1979-yilda Avshar Mehmet Tekirliga turmushga chiqdi, ammo nikoh uzoq davom etmadi — bir necha yildan so‘ng ular ajrashishdi. Turk aktrisasining ikkinchi turmush o‘rtog‘i Kaya Chilingiro‘g‘lu bo‘ldi, undan Hulya qizi Zehrani dunyoga keltirdi. 2005-yilda Avshar turmush o‘rtog‘idan ajrashdi. U o‘z shaxsiy hayotini oshkor qilmaslikka harakat qilsa-da, vaqti-vaqti bilan uning yangi sevgi munosabatlari haqida mish-mishlar tarqaladi.
- Zerrin Tekindor
Zerrin Tekindor 1964-yil 5-avgustda tug‘ilgan. Aktrisaning kinoga yo‘li teatrdan boshlangan. Zerrin yoshligidanoq atrofdagilarga o‘zining misli ko‘rilmagan aktrisalik mahoratini namoyish etgan. U kinodagi ilk rolini 2003-yilda “Ishq ertagi” serialida ikkinchi darajali personaj sifatida ijro etgan. Uch yildan so‘ng, “Xazonrezgi” serialiga taklif etilgach, Zerrinning karyerasi tez surʼatda rivojlana boshladi. Zerrin Tekindor “Kuzey Guney”, “Taqiqlangan sevgi”, “Kurt Said va Aleksandra”, “Sevgi iztirobi”, “Qizil Istanbul”, “Mo‘jizakor doktor”, “Dunyo va men orasida”, “Yuz yillik mo‘jiza” va boshqa ko‘plab seriallarda rol ijro etgan.
Aktrisaning birinchi turmush o‘rtog‘i turkiy teatr ustasi Chetin Tekindor bo‘lib, ular 1988-yilda turmush qurishdi, ammo to‘ydan bir necha oy o‘tgach ajrashib, tez orada yana birga bo‘lishdi. Zerrin eriga Xira ismli o‘g‘il tuhfa etdi. Biroq bu ham ularning nikohini saqlab qola olmadi. Shunga qaramay, ajrashgandan so‘ng, ular o‘g‘illari uchun yaxshi munosabatlarni saqlab qolishga erishdi. Aktrisaning ikkinchi tanloviga aktyor Haluk Bilginer sazovor bo‘ldi. U bilan bir-ikki yil munosabatda bo‘ldi, lekin Haluk teatr rahbari sifatida uning o‘g‘li spektaklini sahnalashtirish istagini rad etgach, ajrashdi. Zerrin o‘g‘li Xiraning tarafini oldi va Haluk bilan aloqani uzdi.
- Vahide Perchin
Vahide Perchin 1965-yil 13-iyunda tug‘ilgan. Turk aktrisasining oilasi kinematografiya olami bilan hech qanday aloqasi yo‘q edi. U maktabni tugatgach, iqtisodchilikka o‘qishga kirdi. Biroq birinchi kursdayoq sanʼatga qiziqishi uyg‘onib, Dokuz Eylul universitetiga o‘tdi. Zerrin Tekindor singari, Vahide ham kinodagi debyutini “Ishq ertagi” serialida qildi. Undan oldin esa ko‘p yillar davomida Adana teatrida rol ijro etgan. Turk seriali yulduzining kinodagi karyerasi tez orada yuksaldi.
Bugungi kunga qadar uning filmografiyasida 20 ga yaqin filmlar mavjud (“Muhtasham yuz yil” “Onam” “Shokir Posho sulolasi: mo‘jizalar va mojarolar”, “Eshik”, “Zuleyha”, “Aldov”). 59 yoshli mashhur aktrisani vatanida faol jamoat arbobi, aktyorlar kasaba uyushmasining sobiq rahbari, sanʼatkor, pedagog va o‘z kasbining haqiqiy ustasi sifatida tanishadi.
Vahide shaxsiy hayotini doimo begona ko‘zlardan pana qiladi. U faqat bir marta turmush qurgan — 1991-yilda Altan Gerdum bilan oila qurib, uch yildan so‘ng qizlari Alize dunyoga kelgan. 2013-yilda Perchin va Gerdum ajrashishdi va aktrisa qizlik familiyasini qaytarib oldi. Biroq sobiq turmush o‘rtoqlar o‘zaro iliq munosabatlarni saqlab qolishga erishdi.
Izoh (0)