Iroqning suv zaxiralari qurg‘oqchil yomg‘ir mavsumidan so‘ng 80 yil ichidagi eng past darajaga tushib ketdi. Bu haqda hukumat vakiliga tayanib Al Arabiya xabar berdi.
Zaxiralar kamayishiga Dajla va Frot daryolaridan keladigan suv ulushining kamayishi sabab bo‘lmoqda. Suv masalasi iqlim o‘zgarishi, qurg‘oqchilik, haroratning ko‘tarilishi va yog‘ingarchilik miqdorining pasayishi tufayli jiddiy ekologik inqirozni boshdan kechirayotgan 46 million aholiga ega mamlakatda asosiy muammoga aylangan.
Rasmiylar qo‘shni Eron va Turkiyada qurilgan yuqori oqimdagi to‘g‘onlarni Iroqni ming yillar davomida sug‘orib kelgan Dajla va Frot daryolari oqimini keskin kamaytirishda ayblamoqda.
Yoz mavsumida suv kamida 18 milliard kub metr bo‘lishi kerak edi... ammo bizda atigi 10 milliard kub metr mavjud. O‘tgan yili strategik zaxiralarimiz ancha yaxshi edi. U hozirgi miqdordan ikki barobar ko‘p edi. Biz 80 yil davomida bunday past zaxirani ko‘rmagan edik. Iroq hozirgi kunda Dajla va Frot daryolaridan o‘ziga tegishli suv ulushining 40 foizidan ham kamrog‘ini olmoqda, dedi Suv xo‘jaligi vazirligi matbuot kotibi Xolid Shamal.
U buning asosiy sababi ikki daryodan keladigan suv oqimining kamayishi ekanini ta’kidladi. Shamal 2025-yil qishda yog‘ingarchilikning kam bo‘lishi natijasida suv sathi pasayishi Iroqdagi vaziyatni yomonlashtirganini aytdi.
Suv tanqisligi Iroqdagi ko‘plab fermerlarni yerni tashlab ketishga majbur qilgan. Hokimiyat ichimlik suvi bilan yetarli darajada ta’minlash uchun fermerlik faoliyatini keskin kamaytirgan.
Iroqda qishloq xo‘jaligi rejalashtiruvi har doim suvga bog‘liq bo‘ladi, bu yil esa 1,5 milliondan ortiq iroqiy dunam (375 ming gektar) “yashil hududlar va hosildor yerlar”ni saqlab qolish maqsad qilingan. O‘tgan yili hukumat dehqonlarga makkajo‘xori, guruch va bog‘lar yetishtirish uchun 2,5 million dunam yer ajratgan edi, dedi Shamal.
Suv Iroq va Turkiya o‘rtasidagi keskinlik manbayi bo‘lib kelgan, bu esa Bag‘dodni samarali suv xo‘jaligi rejalarini qabul qilishga undagan. 2024-yilda Iroq va Turkiya o‘zaro “10 yillik hamkorlik doirasidagi kelishuv”ni imzoladi. Bu, asosan, suv resurslarini yaxshiroq boshqarish uchun loyihalarga sarmoya kiritishni ko‘zda tutadi.
Izoh (0)