Rossiya qo‘shinlari 25-may, yakshanbaga o‘tar kechasi yana bir bor Ukrainaga keng ko‘lamli hujum uyushtirdi. Hujumlar zarba beruvchi dronlar va qanotli raketalar orqali amalga oshirildi. Ukraina hududining bir nechta viloyatlarida portlashlar qayd etildi. Bu haqda mahalliy hokimiyatga tayanib, DW nashri xabar bermoqda.
Ukraina Harbiy-havo kuchlarining ma’lum qilishicha, mamlakatning turli hududlari bo‘ylab ko‘plab zarba beruvchi dronlar harakati aniqlangan, shuningdek, Rossiyaning strategik bombardimonchi samolyotlaridan Ukraina tomon raketa otish hollari kuzatilgan. Ballistik qurol va dronlar tahdidi sababli barcha viloyatlarda havo hujumi xavfi e’lon qilindi.
Kiyev Rossiya dronlari tomonidan ommaviy hujumga uchradi
Rossiya tomonidan amalga oshirilgan zarba beruvchi dronlar hujumining eng kuchli yo‘nalishlaridan biri poytaxt Kiyev bo‘ldi. Kiyev shahar harbiy ma’muriyati bergan ma’lumotlarga ko‘ra, hujum natijasida kamida to‘rt kishi halok bo‘lgan. Dron qoldiqlarining turli tumanlarga tushishi natijasida kamida 16 kishi, jumladan, uch nafar bola jarohatlangan.
Shahar harbiy ma’muriyati rahbari Timur Tkachenkoning aytishicha, Goloseyevo tumanida aholi yashash binosiga dron qoldiqlari tushib, binoda yong‘in va qisman vayronagarchilik sodir bo‘lgan.
Xmelnitskiy, Jitomir, Nikolayev va Xarkov viloyatlarida ham talafotlar bor
Xmelnitskiy viloyati rasmiylari hujum natijasida to‘rt kishi halok bo‘lganini, besh kishi yaralanganini va fuqarolik infratuzilmasiga jiddiy zarar yetkazilganini bildirdi.
Jitomir viloyatida mahalliy favqulodda vaziyatlar xizmatiga ko‘ra, hujum oqibatida uch nafar bola halok bo‘lgan, yana 12 kishi jarohat olgan.
Nikolayevda esa Rossiya dronlari hujumi oqibatida bir kishi halok bo‘lgan, ikki kishi yaralanib, kasalxonaga yotqizilgan. Dron hujumlari natijasida turar joylarga zarar yetgan.
Xarkovda kechasi dron zarbalari sabab bir nechta portlashlar sodir bo‘lgan. Natijada turar joy binolari va boshqa fuqarolik infratuzilmasi zarar ko‘rgan. Uch kishi, jumladan bir bola jarohat olgan. Shuningdek, Chernihov atrofida ham portlashlar qayd etilgan.
Bu — so‘nggi paytlardagi keng ko‘lamli hujumlardan biri
Ukraina Harbiy-havo kuchlari qo‘mondonligining xabar berishicha, o‘tgan kechasi Rossiya so‘nggi paytlardagi eng keng ko‘lamli hujumlardan birini amalga oshirdi. Hujumda 14 ta “Iskander-M” / KN-23 ballistik raketalari, taxminan 250 ta “Shahed” dronlari va boshqa turdagi dron-imitatorlar qo‘llanilgan.
Shahar ma’muriyati bu hujumni “poytaxtga qarshi amalga oshirilgan eng kuchli kompleks hujumlardan biri” deb atadi.
Izoh (0)