Uzbekistan Airports Eron havo hududining yopilishi munosabati bilan bir nechta reyslar Toshkentdagi muqobil aerodromga yo‘naltirilganini e’lon qildi.
Uzbekistan Airways aviakompaniyasining Toshkent—Jidda yo‘nalishidagi HY5343 reysi soat 6:18 da Toshkent aeroportiga qaytib qo‘ndi. Fly Dubai aviakompaniyasining Toshkent—Dubay yo‘nalishidagi FZ1942 reysi mahalliy vaqt bilan soat 6:37 da qo‘ndi.
Shuningdek, Air Cairo aviakompaniyasining Olmaota—Sharm ash-Shayx yo‘nalishi bo‘yicha SM882 reysi (07:46) va Qatar Airways aviakompaniyasining Seul—Doha yo‘nalishi bo‘yicha QR8985 reysi (07:57) Toshkent aeroportiga favqulodda qo‘nishni amalga oshirdi.
Shuningdek, Centrum Air aviakompaniyasining Toshkent—Doha yo‘nalishi bo‘yicha C63341 reysi uchish aeroportida kechiktirildi. Yo‘lovchilar vaqtinchalik terminalga joylashtirildi.
Parvozlar holati haqida batafsil ma'lumot olish uchun aviatashuvchiga murojaat qilish mumkin.
Isroil 13-iyunga o‘tar kechasi Eronga yirik ko‘lamda hujum uyushtirib, mamlakat yadroviy dasturining asosiy obyektlari va yuqori martabali harbiy rahbarlarini nishonga oldi. Mamlakat favqulodda holat e’lon qilib, havo hududini yopdi. Isroil Erondan javob hujumini kutmoqda. Eron Isroil hujumlariga qat’iy javob qaytarishni va’da berdi.
O‘zbekistonning Isroildagi elchixonasi ehtimoliy raketa hujumlari sabab bilan o‘zbekistonliklarga tezkor ehtiyot choralarini ko‘rishni qat’iy tavsiya qildi. O‘zbekistonning Erondagi elchixonasi ham fuqarolarga xavfsizlik choralariga qat’iy rioya qilishni, shuningdek, Eron hukumati va O‘zbekiston elchixonasi rasmiy xabarlarini muntazam ravishda kuzatib borishni tavsiya qildi.
Izoh (0)