Turkish Airlines 23-yanvar kuni Suriya poytaxti Damashqqa parvozlarni qayta tiklanishini e’lon qildi. Bu haqda Turkiye Today xabar berdi.
Aviakompaniya mamlakatga parvoz qiluvchi yo‘lovchilar uchun batafsil sayohat yo‘riqnomasini taqdim etdi. Unga ko‘ra, Eron va Isroil fuqarolari Suriyaga kiritilmaydi. Tegishli taqiq Suriyaning yangi hukumati tomonidan qabul qilingan. Aviakompaniya va Suriya rasmiylari taqiq sababiga izoh bermagan.
Suriya hukumati tomonidan joriy etilgan kirish cheklovlari
- Isroil va Eron fuqarolari Suriyaga kiritilmaydi.
- Yo‘lovchilar, agar bo‘lsa, o‘zlarining Suriya fuqaroligini tasdiqlovchi hujjatlarni ko‘rsatishi shart.
- Livan fuqarolari, agar ota-onalaridan biri Suriya fuqarosi bo‘lsa yoki boshqa mamlakatda yashash guvohnomasi yoxud vizasi mavjud bo‘lsa, kirishi mumkin.
Parvozlarni tiklash to‘g‘risidagi qaror Turkiya va Suriya o‘rtasidagi so‘nggi diplomatik aloqalarni me’yorlashtirish sa’y-harakatlari natijasida qabul qilindi. Turkish Airlines o‘n yildan ortiq vaqt oldin fuqarolar urushi tufayli Suriyaga parvozlarni to‘xtatgandi. Aviakompaniya bosh direktori Bilal Ekshi 23-yanvardan Suriya poytaxti Damashqqa parvozlar qayta tiklanishini e’lon qilgandi.
Izoh (0)