AQSH Iroq elchixonasining asosiy bo‘lmagan xodimlarini xavfsizlikka tahdidlar kuchaygani sababli evakuatsiya qiladi. Bu haqda BBC xabar berdi.
Rasmiylar evakuatsiyaga aynan nima sabab bo‘lganini batafsil ochiqlamagan. Biroq so‘nggi kunlarda Eron yadroviy dasturi bo‘yicha muzokaralar to‘xtab qolgan, deb yozgan BBC. Mudofaa vazirligi ma’lumotlariga ko‘ra, Iroqda 2,5 mingga yaqin AQSH harbiylari joylashgan.
“Biz barcha elchixonalarimizda xodimlarning munosib holatini doimiy ravishda baholab boramiz. So‘nggi tahlillarimizga asoslanib, Iroqdagi missiyamizni qisqartirishga qaror qildik”, dedi AQSH davlat departamenti rasmiysi 11-iyun kuni.
Bu harakat AQSH va Eron o‘rtasidagi bir necha haftalik muzokaralardan so‘ng amalga oshirilgani aytilmoqda. AQSH prezidenti Donald Tramp 11-iyun kuni Eron uranni boyitishni to‘xtatishiga ishonchi kamayib borayotganini bildirgan.
Shu hafta boshida u uzoq vaqtdan beri diplomatik emas, balki harbiy yondashuvni qo‘llab-quvvatlab kelayotgan Isroil bosh vaziri bilan ham 40 daqiqalik telefon suhbati o‘tkazgandi.
Yaqin Sharqning ko‘p qismlaridan xodimlarni evakuatsiya qilish qarori haqida so‘ralganda, Tramp shunday dedi: “Ha, ular ko‘chirilmoqda, chunki u xavfli joy. Nima bo‘lishini esa vaqt ko‘rsatadi”.
Eron o‘z navbatida mamlakatning uranni boyitish dasturi fuqarolik energiyasini ishlab chiqarish uchun mo‘ljallangani va u atom bombasini qurishga urinmayotganini bildirgan.
Izoh (0)