O‘zbekiston milliy terma jamoasi JCh—2026 saralashining 3-bosqich so‘nggi turida Qatarni 3:0 hisobida mag‘lub etib, FIFA reytingida ikki pog‘onaga yuqoriladi.
Toshkentdagi “Bunyodkor” stadionida o‘tgan bahsda qo‘lga kiritilgan g‘alaba O‘zbekistonga 13,40 ochko olib keldi. Natijada umumiy reyting ballar 1449.12 ga yetdi va Temur Kapadze jamoasi 57-pog‘onadan 55-o‘ringa ko‘tarildi.
Qatar esa shu mag‘lubiyat tufayli 13,40 ochkoni yo‘qotdi va 1459.85 ball bilan 53-o‘ringa tushdi. Eslatib o‘tamiz, Qatar 9-turda Eron ustidan qozonilgan g‘alabadan so‘ng 55-o‘rindan 50-pog‘onaga ko‘tarilgan edi.
Hozirda O‘zbekiston Osiyodagi terma jamoalar orasida 6-o‘rinni egallab turibdi. Quyida Osiyoning FIFA reytingi bo‘yicha eng kuchli 10 jamoaning o‘rni va o‘tgan oyga nisbatan o‘zgarishlari keltirilgan:
Osiyo terma jamoalari FIFA reytingida (Top-10, o‘zgarishlar bilan):
- Yaponiya – 1641.24 ochko (1 pog‘ona pasaygan, -11.40 ball)
- Eron – 1624.30 ochko (2 pog‘ona pasaygan, -13.09 ball)
- Janubiy Koreya – 1587.08 ochko (o‘zgarish yo‘q, +12.15 ball)
- Avstraliya – 1578.63 ochko (2 pog‘ona ko‘tarilgan, +24.08 ball)
- Qatar – 1459.85 ochko (2 pog‘ona pasaygan, -13.40 ball)
- O‘zbekiston – 1449.12 ochko (2 pog‘ona ko‘tarilgan, +13.40 ball)
- Saudiya Arabistoni – 1421.48 ochko (o‘zgarish yo‘q, +2.52 ball)
- Iroq – 1416.99 ochko (o‘zgarish yo‘q, +3.59 ball)
- Iordaniya – 1385.54 ochko (2 pog‘ona pasaygan, -3.61 ball)
- BAA (Birlashgan Arab Amirliklari) – 1379.85 ochko (1 pog‘ona pasaygan, -2.85 ball).
Umumiy reytingda hamon Argentina yetakchilik qilmoqda (1 885,36). Ikkinchi pog‘onadan Ispaniya (1 864,60) joy olgan bo‘lsa, kuchli uchlikka Fransiya yakun yasagan (1 849,59).
Eslatib o‘tamiz, ushbu jadval onlayn reyting asosida tuzilgan bo‘lib, FIFA reytingi 10-iyun kuni yangilanadi. Shu sababli, yakuniy natijalar undan biroz farq qilishi mumkin.
Izoh (0)