O‘zbekiston Transport vazirligi ayni vaqtda qaysi mamlakatlar bilan muntazam aviaqatnovlar amalga oshirilayotgani to‘g‘risidagi ro‘yxatni e’lon qildi. Ro‘yxatda 18 ta xorijiy mamlakatlar bilan haftasiga 28 ta yo‘nalish bo‘yicha 144 ta parvozlar amalga oshirilayotgani keltirilgan.
O‘zbekiston fuqarolari bayram kunlari quyidagi xorijiy davlatlarga aviaqatnovlar orqali tashrif buyurishi mumkin:
- Turkiya, 40 ta reys (Toshkent–Istanbul, Samarqand–Istanbul, Farg‘ona–Istanbul);
- Qozog‘iston, 34 ta reys (Toshkent–Olmaota, Samarqand–Olmaota, Urganch—Aqtov, Nukus—Aqtov, Nukus—Aqto‘be);
- Rossiya, 22 ta reys (Toshkent—Moskva, Samarqand—Moskva, Samarqand—Sankt-Peterburg);
- BAA, 16 ta reys (Toshkent—Dubay, Toshkent—Sharja);
- Janubiy Koreya, 4 ta reys (Toshkent—Seul);
- Tojikiston, 4 ta reys (Toshkent—Dushanbe);
- Belarus, 4 ta reys (Toshkent—Minsk);
- Qirg‘iziston, 3 ta reys (Toshkent—Bishkek);
- Misr, 3 ta reys (Toshkent—Qohira, Toshkent—Sharm ash-Shayx);
- Gruziya, 2 ta reys (Toshkent—Tibilisi);
- Germaniya, 2 ta reys (Toshkent—Myunxen);
- Hindiston, 2 ta reys (Toshkent—Dehli);
- Kuvayt, 2 ta reys (Toshkent—Kuvayt);
- Latviya, 2 ta reys (Toshkent—Riga);
- AQSh, 2 ta reys (Toshkent—Nyu-York);
- Eron, 1 ta reys (Toshkent—Tehron);
- Isroil, 1 ta reys (Toshkent—Tel-Aviv);
- Saudiya Arabistoni, 1 ta reys (Toshkent—Ar-Riyod).
“Gazeta.uz”ning yozishicha, muntazam reyslardan tashqari turistik agentliklar muntazam reyslar amalga oshirilmaydigan mamlakatlarga bir martalik (charter) parvozlarni tashkillashtirmoqda. Ularning ro‘yxati bilan Transport vazirligi huzuridagi “O‘zaviatsiya” agentligi sayti orqali tanishish mumkin.
Vazirlik vakolatli organ bilan kelishilmagan reyslarga chiptalar sotilishi mumkin bo‘lgan holatlar haqida ogohlantirgan. So‘nggi oylarda bu kabi bir necha holatlar sodir bo‘lgan.
“Odatda charter reyslar mijozlar to‘planishga qarab tashkillashtiriladi va chiptalar parvoz kuni yoki samolyot qo‘nishidan oldin beriladi. Charter tashkilotchisi parvozni tayyorlash, shu jumladan, barcha kerakli hujjatlarni tayyorlash bo‘yicha barcha mas’uliyatni o‘z zimmasiga oladi, ya’ni charter reysni amalga oshirayotgan yo‘lovchi ushbu turdagi parvozni tashkil etishda hech qanday muammoga duch kelmasligi kerak”, — deyiladi vazirlik matbuot xizmati xabarida.
Avvalroq Urganchda jadvalda bo‘lmagan reysga chipta sotgan Rossiya aviakompaniyasiga qo‘yilgan taqiq olib tashlangani to‘g‘risida xabar berilgandi.