Jahon sog‘liqni saqlash tashkiloti (JSST) COVID-19 koronavirusining yangi shtammi kasallikning kechishini og‘irlashtirishi haqidagi dalillarga ega emas. Bu haqda JSSTning sog‘liqni saqlash sohasidagi favqulodda vaziyatlar bo‘yicha dasturi direktori Maykl Rayan ma’lum qildi, deb yozadi “RBK”.
“Biz o‘zimizni qanday himoya qilishni bilamiz, virusning turidan qat’i nazar, qoidalar o‘zgarmaydi”, — dedi Rayan JSST yangi shtammlar ochilishini ijobiy baholayotganini ta’kidlab.
“Biz muvozanatni topishimiz kerak. Shaffoflikni ta’minlash juda muhim, jamoatchilikka uni o‘z holicha yetkazish juda muhim, lekin bu virus evolyutsiyasining normal qismi ekanligini tushunish ham shunchalik muhimdir”, — deya qo‘shib qo‘ydi JSST vakili.
Rayanning so‘zlariga ko‘ra, virus mutatsiyasini real vaqt rejimida kuzatish global sog‘liqni saqlash uchun haqiqatda ijobiy hodisadir, bunday kuzatuvni olib borayotgan mamlakatlar esa maqtovga loyiq.
JSST vakili qayd etishicha, safarlar uchun cheklovlar kiritayotgan davlatlar xavfni baholashda yuqori darajali ehtiyotkorlikni namoyon qilmoqda. “Bu oqilona ish”, — deya xulosa qildi u.
O‘tgan haftada Buyuk Britaniyada koronavirusning yangi varianti aniqlandi — dastlabki ma’lumotlarga ko‘ra, u odatdagi koronavirusdan 70 foizga yuqumliroq, lekin undan-da xavfliroq emas. Bu haqda mamlakat bosh vaziri Boris Jonson ma’lum qildi.
Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Avvalroq Janubiy Afrika Respublikasi (JAR)da ham o‘xshash mutatsiyadagi virus topilgani haqida xabar berilgan edi. Virusning yangi varianti hozirgi vaksinalar hosil qiladigan immunitetdan kuchliroq bo‘lishi mumkin, degan taxminlar uchun hozircha biror-bir asos yo‘q.
Shu munosabat bilan 20 dan ortiq mamlakat aviaqatnovlarga cheklovlar kiritdi. Avstriya, Argentina, Belgiya, Bolgariya, Germaniya, Isroil, Eron, Irlandiya, Italiya, Kanada, Kolumbiya, Kuvayt, Latviya, Litva, Marokash, Niderlandiya, Ruminiya, Turkiya, Xorvatiya, Finlyandiya, Fransiya, Chili, Chexiya, Shveysariya, Estoniya turli muddatlarga Buyuk Britaniyadan parvozlarni to‘xtatgan. Daniya vaziyatga baho berib, qanday choralar talab qilinishini tushunib olish uchun o‘z havo hududini Buyuk Britaniyadan keladigan samolyotlar uchun 48 soatga yopib qo‘ydi. Polsha 21-dekabr kuni yarim tundan samolyotlar parvozini bekor qildi. Reyslar qachon qayta tiklanishi noma’lum. Keyinroq Isroil, Dominika Respublikasi, Yamayka va Rossiya ham Buyuk Britaniyaga parvozlar taqiqlangani haqida e’lon qildi.
O‘zbekiston ham COVID-19’ning yangi varianti aniqlangan Buyuk Britaniya va yana yetti davlat bilan aviareyslarni to‘xtatdi. Respublika maxsus komissiyasining qarori bilan 21-dekabr sanasidan 2021-yil 10-yanvarga qadar Buyuk Britaniya, Italiya, Germaniya, Daniya, Avstriya, Avstraliya, Niderlandiya va JAR davlatlari bilan xalqaro aviareyslar (kirish, chiqish va tranzit reyslar orqali respublikaga kirish) to‘xtatildi.
Izoh (0)