Rossiya koronavirusning yangi, yanada yuqumliroq shtammi aniqlangani sababli Buyuk Britaniya bilan aviaqatnovlarni vaqtinchalik to‘xtatdi, deb yozadi “RBK”. Parvozlarga taqiq 22-dekabr yarim tundan kuchga kirdi, tegishli qarorni kasallik tarqalishiga qarshi kurash bo‘yicha tezkor shtab qabul qildi.
Hozircha parvozlar bir haftaga bekor qilindi. Shtabdan ma’lum qilinishicha, virusning yangi mutatsiyasi haqidagi axborot o‘rganilmoqda, tahlildan so‘ng keyingi qarorlar qabul qilinadi.
Pandemiya davrida Moskvadan Londonga reyslarni Rossiya aviakompaniyalaridan “Aeroflot” kuniga ikki marta amalga oshirgan. Hukumat tomonidan kiritilgan taqiqlardan so‘ng tashuvchi rejalashtirilgan barcha reyslar bekor qilindi. Kompaniya vakilining “RBK”ga ma’lum qilishicha, yo‘lovchilarning barchasiga chipta uchun sarflangan pullari qaytarib beriladi. “Aeroflot”dan tashqari Wizz Air va British Airways ham Moskvadan Buyuk Britaniyaga parvozlarni amalga oshirgan.
O‘tgan haftada Buyuk Britaniyada koronavirusning yangi varianti aniqlandi — dastlabki ma’lumotlarga ko‘ra, u odatdagi koronavirusdan 70 foizga yuqumliroq, lekin undan-da xavfliroq emas. Bu haqda mamlakat bosh vaziri Boris Jonson ma’lum qildi.
Mavzuga doir: O‘zbekiston COVID-19’ning yangi varianti aniqlangan Buyuk Britaniya va yana yetti davlat bilan aviareyslarni to‘xtatdi
Shu munosabat bilan 20 dan ortiq mamlakat aviaqatnovlarga cheklovlar kiritdi. Avstriya, Argentina, Belgiya, Bolgariya, Germaniya, Isroil, Eron, Irlandiya, Italiya, Kanada, Kolumbiya, Kuvayt, Latviya, Litva, Marokash, Niderlandiya, Ruminiya, Turkiya, Xorvatiya, Finlyandiya, Fransiya, Chili, Chexiya, Shveysariya, Estoniya turli muddatlarga Buyuk Britaniyadan parvozlarni to‘xtatgan. Daniya vaziyatga baho berib, qanday choralar talab qilinishini tushunib olish uchun o‘z havo hududini Buyuk Britaniyadan keladigan samolyotlar uchun 48 soatga yopib qo‘ydi. Polsha 21-dekabr kuni yarim tundan samolyotlar parvozini bekor qildi. Reyslar qachon qayta tiklanishi noma’lum.
Izoh (0)