Isroil hukumati mahalliy korxonalarga Eronga qarshi turish uchun tezroq va yashirin uchuvchisiz uchish qurilmalarini ishlab chiqish vazifasini topshirdi. Bu haqda mudofaa sohasidagi manbalarga tayanib, Breaking Defense xabar berdi.
Ma’lum qilinishicha, Isroil kelajakda Eronga hujum qilish imkoniyatini ko‘rib chiqmoqda, shuning uchun unga yangi hujumchi dronlar kerak. Hozirda mamlakatda ishlab chiqarishning turli bosqichlarida bo‘lgan kamida uchta dronni yig‘ish ishlari olib borilmoqda. Ularning ayrimlari prinsipial jihatdan yangi modellar, boshqalari esa mavjudlarining takomillashtirilgan versiyalari sanaladi.
Dron ishlab chiquvchilar uchish qurilmasining xizmat qilish muddatini oshirish va ularning radarlarda “ko‘rinmas”ligini ta’minlash ustida ishlamoqda. Misol uchun, Hermes-450 droni juda shovqinli aylanuvchi dvigatel bilan jihozlangan bo‘lib, uning tovushlari G‘azo sektori va G‘arbiy Sohil bo‘ylab parvozlar paytida katta muammo tug‘dirmaydi, biroq uzoq masofali operatsiyalarni buzishi mumkin. Bir necha yil oldin IAF va Elbit ovoz balandligini kamaytirish uchun dronlarga ovoz pasaytirgichlarni biriktirdi, ammo bu yetarli natija bermadi.
Bundan tashqari, Isroil Mudofaa vazirligi uzoq masofali parvozlar vaqtida turli vazifalarni bajarish imkonini beruvchi foydali yuklarning yangi turlarini ishlab chiqishdan manfaatdor. Mamlakat juda kuchli jangovar kallaklarga ega va yengil dronlarni ishlab chiqishni ko‘rib chiqmoqda.
Isroil ko‘p yillar davomida o‘zi ishlab chiqargan dronlari borligini yashirib kelgan va 2022-yilning yozidagina hukumat ushbu mavzuni ommaviy axborot vositalarida yoritishga qo‘yilgan taqiqini bekor qilgan. Ko‘plab manbalarga ko‘ra, hukumat sanoat kompaniyalarining tashqi bozorga chiqish uchun shunday qadam tashlagan.
Hozirgi vaqtda Isroilning eng mashhur jangovar uchuvchisiz uchoqlari qatoriga Elbit tizimlari tomonidan ishlab chiqarilgan Hermes-450 va Israel Aerospace Industries (IAI) kompaniyasining Heron-TP droni kiradi.
Hermes-450 maksimal yuk ko‘tarishi 180 kilogramm, parvoz davomiyligi 17 soat va maksimal balandligi 5,5 kilometrdir. Heron-TP’ning maksimal yuk ko‘tarishi esa 2700 kilogram, batareyaning ishlash muddati 30 soat va maksimal balandligi taxminan 14 kilometrni tashkil qiladi.
Mutaxassislarga ko‘ra, bu “aysbergning uchi”, sababi Isroil armiyasining arsenalida maxsus qurollar va foydali yuklar bilan jihozlangan boshqa dronlar ham bor. Isroil muntazam ravishda bu dronlardan butun Yaqin Sharqda uzoq masofali aniq zarbalar uchun foydalanadi, ammo ular haqidagi ma’lumotlar qat’iy sir saqlanadi. Oxirgi operatsiyalardan biri 8-noyabr, seshanba kuni bo‘lib o‘tdi. Uchuvchisiz uchish apparati Erondan Suriyaga ketayotgan yuk mashinalari karvonini urib yubordi, oqibatda 15 kishi halok bo‘ldi.
13-noyabr kuni Isroil Suriyada Eron va Rossiya tomonidan foydalanib kelingan aviabazaga hujum qildi. Raketa hujumi oqibatida ikki nafar harbiy xizmatchi halok bo‘ldi, uch nafari esa yaralandi.
Izoh (0)