Misr prezidenti Abdulfattoh as-Sisi Sudan va Isroil o‘rtasidagi munosabatlarni yaxshilashga qaratilgan harakatlarni ma’qullashini ma’lum qildi, deb xabar beradi “Interfaks”.
“Men AQSh, Sudan va Isroilning ikki mamlakat o‘rtasidagi munosabatlarni yaxshilashga bo‘lgan hamkorlikdagi urinishini ma’qullayman”, — deydi Misr prezidenti. Shuningdek, u “mintaqada tinchlik va barqarorlikni ta’minlashga qaratilgan har qanday harakatni qadrlashini” bildirgan.
Mazkur holatga Yevropa davlatlari ham ijobiy baho bera boshlagan. Masalan, Avstriya kansleri Sebastyan Kurs “Sudan Eron bilan munosabatlarini yaxshilayotganini eshitishdan” xursand ekanligini aytgan. “Qolgan arab davlatlari ham ular ortidan ergashishiga umid qilamiz”, — deb yozadi Kurs o‘zining Twitter’dagi sahifasiga.
Shu bilan birga, Falastinni ozod qilish tashkiloti rasmiy vakili Vasel Abu Yusuf ushbu bitimni tanqid qilib, bu falastinliklar uchun — “orqadan berilgan yangi zarba” ekanligini aytgan. XAMAS harakati ham ushbu kelishuvga tanqidlar yog‘dirib, uni “noto‘g‘ri yo‘nalishdagi qadam” deb atagan.
Eslatib o‘tamiz, 23-oktabr kuni Oq uy Isroilning BAA va Bahrayn bilan munosabatlari yaxshilanishi ortidan navbat Sudanga kelganini e’lon qildi. AQSh prezidenti Donald Tramp Saudiya Arabistoni ham tez orada musulmon davlatlarining Isroil bilan aloqalarini yaxshilashga qo‘shilishiga umid bildirgan.
Mavzuga doir: Bahrayn va Isroil rasman diplomatik aloqalar o‘rnatdi
Izoh (0)