Ba’zan haqiqiy tuyg‘ular eng xavfli vaziyatlarda yagona tayanch bo‘lib qoladi. Aynan hissiy bog‘liqlik bosh qahramonlarga sinovlardan o‘tishga yordam beradi va nima uchun kurashish kerakligini eslatadi. Quyidagi filmlarni ko‘rgandan so‘ng, yaqinlaringizni mahkamroq quchoqlash va odatda “keyinroqqa” qoldiradigan so‘zlaringizni aytish istagi paydo bo‘lishi aniq.
“Armageddon”
Yer tomon uchib kelayotgan asteroid ko‘rinishidagi qiyomat tahdidi ostida ham omon qolishga erishgan sevgi qissasi. Keng miqyosli portlashlar fonida rejissyor Maykl Bey tomoshabinni maxsus effektlardan kam bo‘lmagan darajada hayajonga soladigan ta’sirli sahnalarni mahorat bilan kiritadi: Bryus Uillis ijro etgan otaning qahramonligi va fojiali xayrlashuv sahnasi xotirada mangu muhrlanib qoladi.
“Armageddon” filmi byudjeti 140 million dollardan oshgan bo‘lsa-da, biroq tez fursatda o‘zini oqladi va 1998-yilning eng ko‘p daromad keltirgan filmiga aylandi. Livning otasi Stiven Tayler boshchiligidagi Aerosmith guruhining “I Don’t Want to Miss a Thing” qo‘shig‘i film saundtreki sifatida to‘rt hafta davomida Billboard Hot 100 ro‘yxatida birinchi o‘rinni egallab turdi.
“Oramizdagi tog‘lar”
Samolyot halokatidan so‘ng, ikki begona shaxs aloqa vositalari, oziq-ovqat va yordam olish imkoniyatisiz muzli sahroda qolib ketadi. Idris Elba va Keyt Uinslet ijro etgan qahramonlar — shifokor Ben va jurnalist Aleks bir-biriga suyanishga majbur bo‘ladi.
“Oramizdagi tog‘lar” filmi Charlz Martinning shu nomdagi romani asosida falastinlik-gollandiyalik rejissyor Hani Abu-Assad tomonidan suratga olingan. Film Kanadaning qorli tog‘larida suratga olingan bo‘lib, u yerda harorat minus 38 darajagacha pasaygan. Shunga qaramay, aktyorlar tabiiylikni saqlash uchun dublyorlardan voz kechgan. Ularning xavfsizligini ta’minlash maqsadida tog‘ga faqat bir nechta suratga olish guruhi a’zolarigina birga ko‘tarilgan. Keyt Uinslet o‘z suhbatida sovuq va baland tog‘lar havosi tufayli bu filmda suratga tushish “Titanik”dan ham qiyinroq bo‘lganini ta’kidlagan.
“Imkonsiz”
Real voqealarga asoslangan film 2004-yilda Tailandda sodir bo‘lgan sunami paytida omon qolgan oila haqida hikoya qiladi. Bu tabiiy ofat 230 ming kishining umriga zomin bo‘lgan edi. Bosh rollarni Naomi Uotts va Yuen MakGregor ijro etgan bo‘lib, ularning qahramonlari vayronalar va tartibsizliklar orasida sarosimaga tushib, bir-birlarini izlashga urinadi. “Imkonsiz” filmi nafaqat yengib bo‘lmaydigan tabiat kuchlari haqida, balki har qanday sinovga bardosh bera oladigan muhabbat to‘g‘risida ham hikoya qiladi.
Ispan rejissyori Xuan Antonio Bayon fojia ko‘lamidan ko‘ra oilaviy bog‘liqlik kuchiga ko‘proq e’tibor qaratadi. Film suratga olish ishlari ulkan suv havzasida olib borildi, u yerda aktyorlar oqim va bo‘ron ta’sirlari bilan kurashishga majbur bo‘lishdi. Ommaviy sahnalarda qatnashganlarning aksariyati sunamidan omon qolgan odamlar edi. Mariya rolini ijro etgani uchun Uotts “Oskar” mukofotiga nomzod bo‘ldi, yosh Tom Holland esa yil kashfiyotiga aylandi.
“Dovul iskanjasida”
Sheylin Vudli va Sem Klaflin ijrosidagi yosh juftlik romantik dengiz sayohatiga chiqadi, ammo bu sayohat eng kuchli bo‘ronlardan biri ularni ta’qib qilganda hayot-mamot kurashiga aylanadi. To‘liq izolyatsiya va yolg‘izlik sharoitida Vudlining qahramoni yaxtani boshqarishni o‘z zimmasiga oladi va imkonsiz ishni amalga oshiradi. Film 1984-yilda sayohatchi va yozuvchi Tami Li Oldxem boshidan kechirgan haqiqiy sevgi va halokat voqeasiga asoslangan.
Rejissyor Baltasar Kormakur filmni deyarli to‘liq suvda, CGI dan kam foydalangan holda suratga oldi. Shu bois aktyorlar okeandagi haqiqiy yaxtada ishlashga majbur bo‘ldilar. Suratga olish ishlari atigi 5 hafta davom etdi, biroq shu qisqa vaqt ichida ham Vudli ba’zi oziq-ovqatlardan voz kechishiga va qat’iy ovqatlanish rejimiga rioya qilishiga to‘g‘ri keldi. Buning sababi uning qahramoni 41 kun davomida kemada oziq-ovqat va suvsiz qolgani edi.
“Titanik”
Leonardo Di Kaprio va Keyt Uinslet gavdalantirgan Jek va Rouz obrazlari eng hashamatli kemada uchrashib, bir-biriga ko‘ngil qo‘yishdi... Ularning uchrashuvi haqiqiy falokatning ko‘zgudagi aksi edi: ikkalasi ham o‘rganib qolgan hayot tarzini hisobga olsak, shunchalik farqli dunyolarning to‘qnashuvi ijobiy natijaga olib kelishi amrimahol edi.
“Titanik” “Oskar” mukofotlarini qo‘lga kiritish bo‘yicha rekord o‘rnatdi: 14 ta nominatsiyadan 11 ta oltin haykalchani qo‘lga kiritdi, prokat daromadi 2 milliard dollardan oshdi va 15 hafta davomida Amerika kinoprokat reytingida peshqadamlik qildi. Filmning yakunida Selin Dion ijrosidagi “My Heart Will Go On” qo‘shig‘i mashhur bo‘lib ketdi, garchi dastlab rejissyor Jeyms Kemeron filmda qo‘shiqlardan foydalanishga qat’iyan qarshi bo‘lgan edi.
Izoh (0)