The New York Times nashri XXI asrning eng yaxshi 100 ta filmi ro‘yxatini tuzdi, deb yozadi “Pravila jizni”.
Ushbu ro‘yxatni shakllantirish uchun jurnalistlar 500 dan ortiq rejissyor, aktyor va boshqa taniqli Gollivud vakillari bilan suhbatlashdi. Ulardan har biri o‘zining eng sevimli 10 filmini sanab o‘tishi so‘raldi va bildirilgan fikrlar asosida umumiy reyting tuzildi.
Foto: “Pravila jizni”
So‘rovda taniqli rejissyor va aktyorlar — Gilyermo del Toro, Pedro Almodovar, Sofiya Koppola, Julianna Mur, Jon Turturro, Chivetel Ejiofor, Barri Jenkins, Mayki Medison va boshqalar ishtirok etdi.
Ro‘yxatning birinchi o‘rnini janubiy koreyalik rejissyor Pon Jun Xoning “Parazitlar” filmi egalladi. Mazkur kartina Kimlar oilasining turli hiylalar yordamida badavlat insonlar uyiga ishga joylashgani haqida hikoya qiladi. Loyiha “Eng yaxshi film”, “Eng yaxshi rejissyor”, “Eng yaxshi ssenariy” va “Eng yaxshi xalqaro film” kabi nominatsiyalarda to‘rtta “Oskar” mukofotiga sazovor bo‘lgan.
Foto: “Pravila jizni”
Reytingning ikkinchi pog‘onasida Devid Linchning “Malxolland drayv” filmi joy oldi. Unda xotirasini yo‘qotgan qiz va aktyorlik orzusidagi yosh ayolning hikoyasi aks etadi.
Uchinchi o‘rinni esa Pol Tomas Anderson tomonidan suratga olingan “Neft” filmi egallagan. Filmda XX asr boshlarida neft sanoatining rivojlanishi va uning fonida kechadigan turli voqealar tasvirlanadi. Kartinada bosh rolni ijro etgan Deniyel Dey-Luis ushbu roli uchun “Oskar” mukofotini qo‘lga kiritgan.
To‘rtinchi o‘ringa Vong Kar Vayning ushalmagan sevgi haqida hikoya qiluvchi “Muhabbat kayfiyati” filmi munosib topilgan. Beshinchi o‘rinda esa Barri Jenkinsning “Oy nuri” filmi qayd etilgan. Bu film Mayamidagi qora tanli o‘smirning og‘ir va murakkab davrni boshidan kechirgan holda ulg‘ayish davri haqida hikoya qiladi.
Foto: “Pravila jizni”
Ro‘yxatga kiritilgan filmlar:
“Parazitlar”, rej. Pon Chjun Xo, 2019
“Malxolland drayv”, rej. Devid Linch, 2001
“Neft”, rej. Pol Tomas Anderson, 2007
“Muhabbat kayfiyati”, rej. Vong Karvay, 2000
“Oy nuri”, rej. Barri Jenkins, 2016
“Qariyalarga bu yerda joy yo‘q”, rej. Koen birodarlar, 2007
“Beg‘ubor ongning abadiy porlashi”, rej. Mishel Gondri, 2004
“Daf bo‘l”, rej. Jordan Pil, 2017
“Ruhlar olami”, rej. Xayao Miyadzaki, 2001
“Ijtimoiy tarmoq”, rej. Devid Fincher, 2010
“Telba Maks: G‘azab yo‘li”, rej. Jorj Miller, 2015
“Qiziqish zonasi”, rej. Jonatan Gleyzer, 2023
“Inson farzandi”, rej. Alfonso Kuaron, 2006
“Manfur kimsalar”, rej. Kventin Tarantino, 2009
“Xudo shahri”, rej. Fernandu Meyrelis, 2002
“Uzlatdagi ajdarho”, rej. Ang Li, 2000
“Bukri tog‘”, rej. Ang Li, 2005
“Onangizni ham”, rej. Alfonso Kuaron, 2001
“Munajjim”, rej. Devid Fincher, 2007
“Uoll-strit bo‘risi”, rej. Martin Skorseze, 2013
Izoh (0)