Баъзан ҳақиқий туйғулар энг хавфли вазиятларда ягона таянч бўлиб қолади. Айнан ҳиссий боғлиқлик бош қаҳрамонларга синовлардан ўтишга ёрдам беради ва нима учун курашиш кераклигини эслатади. Қуйидаги фильмларни кўргандан сўнг, яқинларингизни маҳкамроқ қучоқлаш ва одатда “кейинроққа” қолдирадиган сўзларингизни айтиш истаги пайдо бўлиши аниқ.
“Армагеддон”
Ер томон учиб келаётган астероид кўринишидаги қиёмат таҳдиди остида ҳам омон қолишга эришган севги қиссаси. Кенг миқёсли портлашлар фонида режиссёр Майкл Бей томошабинни махсус эффектлардан кам бўлмаган даражада ҳаяжонга соладиган таъсирли саҳналарни маҳорат билан киритади: Брюс Уиллис ижро этган отанинг қаҳрамонлиги ва фожиали хайрлашув саҳнаси хотирада мангу муҳрланиб қолади.
“Армагеддон” фильми бюджети 140 миллион доллардан ошган бўлса-да, бироқ тез фурсатда ўзини оқлади ва 1998 йилнинг энг кўп даромад келтирган фильмига айланди. Ливнинг отаси Стивен Тайлер бошчилигидаги Аэросмитҳ гуруҳининг “I Донът Wант то Мисс а Тҳинг” қўшиғи фильм саундтреки сифатида тўрт ҳафта давомида Billboard Ҳот 100 рўйхатида биринчи ўринни эгаллаб турди.
“Орамиздаги тоғлар”
Самолёт ҳалокатидан сўнг, икки бегона шахс алоқа воситалари, озиқ-овқат ва ёрдам олиш имкониятисиз музли саҳрода қолиб кетади. Идрис Элба ва Кейт Уинслет ижро этган қаҳрамонлар — шифокор Бен ва журналист Алекс бир-бирига суянишга мажбур бўлади.
“Орамиздаги тоғлар” фильми Чарльз Мартиннинг шу номдаги романи асосида фаластинлик-голландиялик режиссёр Ҳани Абу-Ассад томонидан суратга олинган. Фильм Канаданинг қорли тоғларида суратга олинган бўлиб, у ерда ҳарорат минус 38 даражагача пасайган. Шунга қарамай, актёрлар табиийликни сақлаш учун дублёрлардан воз кечган. Уларнинг хавфсизлигини таъминлаш мақсадида тоғга фақат бир нечта суратга олиш гуруҳи аъзоларигина бирга кўтарилган. Кейт Уинслет ўз суҳбатида совуқ ва баланд тоғлар ҳавоси туфайли бу фильмда суратга тушиш “Титаник”дан ҳам қийинроқ бўлганини таъкидлаган.
“Имконсиз”
Реал воқеаларга асосланган фильм 2004 йилда Таиландда содир бўлган цунами пайтида омон қолган оила ҳақида ҳикоя қилади. Бу табиий офат 230 минг кишининг умрига зомин бўлган эди. Бош ролларни Наоми Уотц ва Юен МакГрегор ижро этган бўлиб, уларнинг қаҳрамонлари вайроналар ва тартибсизликлар орасида саросимага тушиб, бир-бирларини излашга уринади. “Имконсиз” фильми нафақат енгиб бўлмайдиган табиат кучлари ҳақида, балки ҳар қандай синовга бардош бера оладиган муҳаббат тўғрисида ҳам ҳикоя қилади.
Испан режиссёри Хуан Антонио Баён фожиа кўламидан кўра оилавий боғлиқлик кучига кўпроқ эътибор қаратади. Фильм суратга олиш ишлари улкан сув ҳавзасида олиб борилди, у ерда актёрлар оқим ва бўрон таъсирлари билан курашишга мажбур бўлишди. Оммавий саҳналарда қатнашганларнинг аксарияти цунамидан омон қолган одамлар эди. Мария ролини ижро этгани учун Уотц “Оскар” мукофотига номзод бўлди, ёш Том Ҳолланд эса йил кашфиётига айланди.
“Довул исканжасида”
Шейлин Вудли ва Сем Клафлин ижросидаги ёш жуфтлик романтик денгиз саёҳатига чиқади, аммо бу саёҳат энг кучли бўронлардан бири уларни таъқиб қилганда ҳаёт-мамот курашига айланади. Тўлиқ изоляция ва ёлғизлик шароитида Вудлининг қаҳрамони яхтани бошқаришни ўз зиммасига олади ва имконсиз ишни амалга оширади. Фильм 1984 йилда саёҳатчи ва ёзувчи Тами Ли Олдхем бошидан кечирган ҳақиқий севги ва ҳалокат воқеасига асосланган.
Режиссёр Балтасар Кормакур фильмни деярли тўлиқ сувда, CGI дан кам фойдаланган ҳолда суратга олди. Шу боис актёрлар океандаги ҳақиқий яхтада ишлашга мажбур бўлдилар. Суратга олиш ишлари атиги 5 ҳафта давом этди, бироқ шу қисқа вақт ичида ҳам Вудли баъзи озиқ-овқатлардан воз кечишига ва қатъий овқатланиш режимига риоя қилишига тўғри келди. Бунинг сабаби унинг қаҳрамони 41 кун давомида кемада озиқ-овқат ва сувсиз қолгани эди.
“Титаник”
Леонардо Ди Каприо ва Кейт Уинслет гавдалантирган Жек ва Роуз образлари энг ҳашаматли кемада учрашиб, бир-бирига кўнгил қўйишди... Уларнинг учрашуви ҳақиқий фалокатнинг кўзгудаги акси эди: иккаласи ҳам ўрганиб қолган ҳаёт тарзини ҳисобга олсак, шунчалик фарқли дунёларнинг тўқнашуви ижобий натижага олиб келиши амримаҳол эди.
“Титаник” “Оскар” мукофотларини қўлга киритиш бўйича рекорд ўрнатди: 14 та номинациядан 11 та олтин ҳайкалчани қўлга киритди, прокат даромади 2 миллиард доллардан ошди ва 15 ҳафта давомида Америка кинопрокат рейтингида пешқадамлик қилди. Фильмнинг якунида Селин Дион ижросидаги “Мй Heart Wилл Го Он” қўшиғи машҳур бўлиб кетди, гарчи дастлаб режиссёр Жеймс Кемерон фильмда қўшиқлардан фойдаланишга қатъиян қарши бўлган эди.
Изоҳ (0)