Amerikalik aktyor Harrison Ford Gollivudning eng taniqli ijodkorlaridan biri sanaladi. 2025-yil 13-iyul kuni u 83 yoshga to‘ldi. Ayni keksalik davrida ham aktyor professional faoliyatini davom ettirib, katta ekranlarda yirik rollarni ijro etmoqda. Quyida Fordning so‘nggi yillardagi ijodi, shaxsiy hayoti va turmush tarzi haqida qisqacha ma’lumot beriladi.
Indiana Jons roliga yana qaytish
Zukko va hazilkash arxeolog olim — Indiana Jons Harrison Fordning eng yorqin obrazlaridan biri sanaladi. Aktyor ilk bor 1981-yilda “Indiana Jons: yo‘qolgan kema izidan” filmida paydo bo‘ldi. Loyiha katta muvaffaqiyat qozongach, uning davomini suratga olishga qaror qilindi. Keyinchalik bu film butun boshli franshizaga aylandi va to‘rt marta davom ettirildi.
Oxirgi film “Indiana Jons: billur bosh suyaklar qirolligi” 2008-yilda katta ekranlarga chiqdi. Film 185 million dollarlik byudjet evaziga 790 million dollardan ortiq daromad keltirdi va bir nechta mukofotlarga sazovor bo‘ldi. Shunda Ford 66 yoshda edi. U ham katta yoshda jangovar rollarni bajarayotgan Tom Kruzga o‘xshab ketadi: Kruz 63 yoshda bo‘lishiga qaramay, ekshn janridagi filmlarda rol o‘ynashdan voz kechgani yo‘q.
Franshizaning navbatdagi qismi haqida rejissyorlar to‘rtinchi film chiqqan zahoti o‘ylay boshlashgan, biroq turli omillar bunga to‘sqinlik qilgan: avval studiya sotilgan, so‘ngra ssenariy qayta-qayta yozilgan, keyin esa koronavirus pandemiyasi boshlanib ketgan.
Aktyor o‘zi ham loyihadan chiqib ketish arafasida bo‘lgan — suratga olish ishlari boshida jiddiy jarohat olib, tiklanishga uzoq vaqt talab qilingan. Shunga qaramay, barcha to‘siqlardan o‘tildi va film suratga olindi. Franshizaning so‘nggi qismi 2023-yilda namoyish etildi. Film ekranlarga chiqqach, OAVda aktyor faoliyatini yakunlaydi, degan mish-mishlar tarqaldi. Biroq Ford bunga rad javobini berdi. U “Kapitan Amerika: yangi dunyo” hamda “Yashin zarbasi” kabi superqahramonlik filmlarida suratga tushdi. 2025-yilda esa “Terapiya” serialidagi roli uchun “Oltin globus” mukofotiga nomzod bo‘ldi.
Uchinchi turmush o‘rtog‘i bilan baxtli hayot kechirmoqda
Harrison Ford umr yo‘ldoshini darhol topmagan bo‘lsa-da, aktyor hozirda aktrisa Kalista Flokhart bilan 10 yildan ortiq vaqt mobaynida baxtli turmush kechirib kelmoqda. Flokhart “Elli Makbil” serialidagi roli bilan tanilgan. Ularning tanishuvi 2002-yilda “Oltin globus” mukofoti topshirish marosimida bo‘lgan. Kalista tasodifan Ford ustiga ichimligini to‘kib yuborgan. Shu voqeadan so‘ng ular suhbatlashib qolishgan va aktyor o‘z uyidagi ziyofatga uni taklif qilgan. Shu tariqa ular do‘stlashib qolgan.
Juftlik 2010-yilda sakkiz yillik tanishuvdan so‘ng rasmiy nikohdan o‘tgan. Bugunga kelib ular deyarli 20 yildan beri birga yashab kelayotgan Gollivuddagi eng mustahkam juftliklardan biri sanaladi. Kalista bir intervyusida ularning yoshidagi farq haqida shunday degan:
“Yosh tafovuti meni bezovta qilmaydi. Men doim u mendan 22 yosh katta ekanini unutib qo‘yaman”.
Yulduzlik kasaliga chalinmagan
Mashhurligiga qaramay, Ford hanuz oddiy hayot tarzini afzal ko‘radi. U ko‘p vaqtini rafiqasi va asrab olgan o‘g‘li Liam bilan Vayomingdagi katta fermasida o‘tkazadi. OAV ma’lumotlariga ko‘ra, aktyor ushbu ko‘chmas mulkning deyarli yarmini qo‘riqxona uchun hadya qilgan. Kalista bilan tanishgan vaqtida u Liamni endigina farzandlikka olgan edi va Ford uni darhol o‘z farzandi sifatida qabul qilgan. Bugungi kunda Liam 24 yoshda, aktyorning avvalgi nikohlaridan tug‘ilgan farzandlari esa 50 yoshdan oshgan.
2020-yilda bergan intervyusida u vaqti-vaqti bilan Los Anjeles va Nyu Yorkda ham yashashini aytgan. Shunga qaramay, aktyor xizmatkorlar yoki yordamchilardan deyarli foydalanmaydi.
“Ba’zan hech kim mening istagimni bajarmaydigan, o‘zim do‘konga borib, idish-tovoq yuvadigan holatlarga tushishim kerak. Men panjara tuzata olaman, texnikani ta’mirlayman, hovlini qordan tozalayman. Uyda qolganimda ish doim topiladi”, degan Ford The Land Report nashriga bergan intervyusida. Bundan tashqari, aktyor ranchosida soatlab sayr qiladi, professional tarzda vertolyot va samolyot boshqaradi. Sport bilan shug‘ullanishni esa muntazam davom ettiradi.
Izoh (0)