Marvel olami filmlari ko‘plab aktyorlar uchun karyerasidagi keskin burilish nuqtasiga aylandi. Ular dunyo bo‘ylab mashhurlikka erishdi, millionlab tomoshabinlar e’tiborini tortdi hamda mo‘may daromadga ega bo‘ldi. Biroq bunday muvaffaqiyat ijodiy erkinlikni cheklovchi omillarga ham ega: bir obrazga uzoq yillar bog‘lanish yangi rollarda ochilish imkoniyatlarini sezilarli darajada kamaytiradi. Quyida superqahramon obrazidan keyin Gollivud yulduzlarining karyerasi qanday davom etgani haqida so‘z boradi.
Skarlett Yoxansson
Skarlett Yoxansson Marvel olamida rus josusi Natasha Romanoff, ya’ni Qora beva obrazini yaratib, franshizaning sakkizta filmida ishtirok etdi. Biroq u faqat superqahramonlik rollari bilan cheklanib qolmadi. Yoxansson yirik blokbasterlar va mustaqil kinolarda birdek muvaffaqiyat qozondi. “Nikoh tarixi” filmi unga “Oskar” nominatsiyasini olib keldi, “Qurollangan arvoh” esa uning yirik loyihalaridan biri bo‘ldi.
Aktrisa “Kuyla” va Ues Andersonning “Itlar oroli” animatsion filmlarida ovoz berdi. Natasha rolidagi so‘nggi chiqishi 2021-yilda suratga olingan “Qora beva” filmida bo‘ldi. Hozircha bu obrazga qaytish rejalashtirilmagan.
Marvel’dan so‘ng Skarlett yana Ues Anderson bilan ikki marta ishladi va “Asteroidlar shahri”, “Finikiya sxemasi” kabi filmlarida ishtirok etdi. 2025-yil iyul oyida esa u “Yura davri olami: uyg‘onish” filmida paydo bo‘ladi.
Mark Ruffalo
Mark Ruffalo Halk rolini aktyor Edvard Norton va Marvel studiyasi o‘rtasidagi kelishmovchilikdan so‘ng qabul qilib olgan. Aynan shu sababli bu obraz asosida alohida film suratga olinmagan. Ruffalo Halk rolida 13 yil davomida ishtirok etdi va Marvel koinotining muhim shaxslaridan biriga aylandi. Biroq “Qasoskorlar” filmidan keyin u faqatgina “Ayol Halk: advokat” serialida epizodik rol o‘ynadi.
Ruffalo o‘zining aktyorlik salohiyatini Marvel’dan boshqa loyihalarda ham ko‘rsatdi. U Yorgos Lantimosning “Bechora baxtsizlar” filmida ishtirok etdi. 2025-yilda esa “Yolg‘onlar illyuziyasi 3” filmi ekranlarga chiqadi, unda Ruffalo yana FQB agenti Dilan Rods obrazini gavdalantiradi. Mish-mishlarga ko‘ra, Ruffalo “O‘rgimchak odam 4” filmida ham ishtirok etishi mumkin.
Elizabet Olsen
Elizabet Olsen Marvel olamiga “Qasoskorlar: Altron davri” filmi orqali kirib keldi va Vanda Maksimoff obrazini yaratdi. Mazkur rol aktrisa karyerasida ulkan burilish bo‘ldi. Marvel loyihalari orasida u “Shamollar daryosi” trilleri, “Ingrid G‘arbga yo‘l oladi” komedik dramasi, “Sevgi va o‘lim” seriallarida ham ishtirok etdi.
Yaqinda Elizabet Vanda Marvel’ning yangi filmlarida paydo bo‘lmasligini ma’lum qildi. “Doktor Streynj: telba koinot” filmi iliq kutib olinmagach, bu obrazning kelajagi mavhumligicha qolmoqda. Shu bilan birga, aktrisaga Marvel’dan tashqarida ham hozircha yirik loyihalardan taklif bo‘lmadi.
Hyu Jekman
Hyu Jekman va uning Rosomaxa obrazi superqahramonlar orasida eng mashhur obrazlardan biridir. Birinchi film 2000-yilda 20th Century Fox tomonidan suratga olingan bo‘lsa, so‘nggi “Dedpul va Rosomaxa” 2024-yilda ekranlarga chiqdi. Jekman bu obrazda uchta alohida filmda rol o‘ynadi. Aktyor so‘nggi yetti yil davomida Rosomaxa roliga qaytmasligini bildirgan, ammo “G‘aroyib odamlar” franshizasi huquqlari Disney qo‘liga o‘tgach, do‘sti Rayan Reynolds uni “Dedpul” loyihasiga qaytarishga ko‘ndirdi.
Marvel’dagi tanaffus davomida Jekman “Qanday qilib prezident bo‘lmaslik kerak”, “Benuqson” komedik dramasi va “Xotiralar” fantastik trillerida rol o‘ynadi. 2022-yilda u “O‘g‘il” filmida bosh rolni ijro etdi, ammo bu filmlar kassa daromadlari yuqori bo‘lmadi.
Robert Dauni
“Temir odam” obrazi orqali Robert Dauni o‘n yildan ortiq vaqt davomida franshizaning asosiy yuzi bo‘lib keldi. Uning superqahramonlik obrazlari “Qasoskorlar: intiho” filmi bilan yakun topdi. Keyinchalik Marvel studiyasi janjallar sababli Jonatan Meyjorsni asosiy yovuz obrazdan olib tashlab, uning o‘rniga doktor Dum obrazini tanladi va bu rolga aynan Dauni taklif qilindi.
Hozirda aktyor yana Sherlok Holms obraziga qaytishi kutilmoqda, uchinchi film ishlab chiqarishga tayyorgarlik ko‘rish bosqichida.
Tobi Maguayr
O‘rgimchak odam Marvel dunyosidagi eng mashhur superqahramonlardan biri bo‘lib, so‘nggi 25 yil ichida bu rolni uch nafat aktyor ijro etdi. Ulardan birinchi bo‘lib Tobi Maguayr 2002-yildan boshlab suratga olingan trilogiyada ishtirok etdi. Uning so‘nggi chiqishi “O‘rgimchak odam 3: ko‘zgudagi dushman aksi” filmi bo‘lib, syujetning haddan tashqari murakkabligi sababli u turli tanqidlarga uchradi.
Marvel’ning multikoinot g‘oyasi qayta joriy etilgach, Maguayr “O‘rgimchak odam: uyga yo‘l yo‘q” filmida yana Piter Parker obraziga qaytdi. Marvel’dan tashqari boshqa loyihalarda esa Maguayr kamroq ko‘rindi. U ishtirok etgan mashhur filmlar qatoriga “Buyuk Getsbi”, “Aka-ukalar” va “Mehnat bayrami” kiradi. Shuningdek, u prodyuserlik bilan ham shug‘ullandi, biroq bu loyihalari tijoriy muvaffaqiyatga erisha olmagan.
Izoh (0)