So‘nggi yillarda mashhurlar biror mahsulot reklamasida ishtirok etish bilan cheklanmay, to‘laqonli brendlar yaratishga kirishdi. Ular nafaqat mahsulot yuziga aylandi, balki tadbirkorlik sohasida faol mehnat qildi va o‘z auditoriyasini shakllantirdi. So‘ng o‘z kompaniyalarini rivojlantirib, katta foyda evaziga sotib yubordi. Quyida ana shunday muvaffaqiyatga erishgan taniqli insonlar haqida so‘z yuritamiz.
Heyli Biber va Rhode Skin
Model va tadbirkor Heyli Biber 2022-yilda Rhode Skin brendini ishga tushirdi. U minimalizm va “shishadek yaltiroq” teri effektiga asoslangan mahsulotlar seriyasini taqdim etdi. Biberning kompaniyasi qisqa fursatda katta muvaffaqiyatga erishdi.
2025-yilning may oyida e.l.f. Beauty kompaniyasi Rhode’ni 1 milliard dollarga baholangan bitim orqali sotib oldi: uning 600 millioni naqd pulda, 200 millioni aksiyalar ko‘rinishida, qolgan 200 millioni esa keyingi uch yildagi natijalarga bog‘liq bonus sifatida belgilandi.
Bitimdan so‘ng ham Biber brend rahbari sifatida qoldi. Hozirda u kreativ direktor va innovatsiyalar bo‘yicha menejer lavozimida faoliyat yuritmoqda. Rhode yaqin vaqt ichida Sephora do‘konlarida ham sotuvga chiqishi mo‘ljallangan.
Jorj Kluni va Casamigos Tequila
Jorj Kluni 2013-yilda Rande Gerber va Mayk Meldman bilan birgalikda Casamigos Tequila brendiga asos soldi. Dastlab bu ichimlik shunchaki aktyor do‘stlari davrasida ulashish uchun yaratilgan edi. Biroq sifatga bo‘lgan e’tibor va Klunining mashhurligi brendni tez orada ommalashtirdi.
2017-yilda dunyodagi yirik alkogol kompaniyalaridan biri bo‘lgan Diageo kompaniyasi Casamigos’ni 1 milliard dollarga sotib oldi: 700 millioni darhol, 300 millioni esa keyingi ko‘rsatkichlarga qarab bonus tarzida to‘landi. Bu bitim alkogol bozoridagi eng yirik kelishuvlardan biri sifatida tarixga kirdi.
Jessika Alba va The Honest Company
Mashhur aktrisa Jessika Alba 2011-yilda The Honest Company brendiga asos soldi. Uning maqsadi bolalar va uy uchun ekologik toza va toksinlarsiz xo‘jalik mahsulotlari ishlab chiqarish edi. Ushbu g‘oya Albaning o‘z oilasining xavfsizligiga bo‘lgan e’tiboridan kelib chiqqan.
2021-yilda kompaniya birjada ro‘yxatga olinib, 1,4 milliard dollarga baholandi. Albaga tegishli ulush esa taxminan 120 million dollar deb topildi. 2024-yilda aktrisa kreativ direktorlik lavozimini tark etdi, biroq direktorlar kengashida qolishda davom etdi.
Bugungi kunda The Honest Company mahsulot turlarini kengaytirib, ekologik toza mahsulot ishlab chiqarish, ochiqlik va iste’molchi ishonchi asosida bozordagi mavqeini mustahkamlab bormoqda.
Dr. Dre va Beats by Dre
2006-yilda hip-hop afsonasi Dr. Dre va prodyuser Jimmi Ayovin birgalikda Beats by Dre brendini yaratdi. Maqsad — Apple’ning oq naushniklariga raqobatchi bo‘ladigan, bas ovozli va zamonaviy dizayndagi quloqchinlarni ishlab chiqish edi. Natijada Beats qisqa fursatda dizayni, yirik marketing kampaniyalari va mashhurlar ishtirokidagi reklamalari tufayli mashhurlikka erishdi.
2014-yilda Apple kompaniyasi Beats’ni 3 milliard dollarga sotib oldi. Bu Apple tarixidagi eng yirik xarid bo‘ldi.
Kayli Jenner va Kylie Cosmetics
Model va tadbirkor Kayli Jenner 2015-yilda Kylie Cosmetics brendini ishga tushirdi. U kosmetikaga bo‘lgan qiziqishini biznesga aylantirib, ilk mahsuloti — Kylie Lip Kit’ni taqdim etdi. Ijtimoiy tarmoqlardagi ulkan auditoriyasi orqali brend tez orada go‘zallik sanoatidagi yetakchilardan biriga aylandi.
2019-yilda Coty Inc. kompaniyasi brendning 51 foiz ulushini 600 million dollarga xarid qildi va butun brendni 1,2 milliard dollarga baholadi. Kayli qolgan 49 foiz ulushni saqlab qolgan holda, mahsulot ishlab chiqish va marketingda ishtirok etishda davom etdi.
Rayan Reynolds va Mint Mobile
Aktyor Rayan Reynolds 2019-yilda arzon mobil aloqa operatori Mint Mobile brendining aksiyalarini xarid qildi. U o‘zining hazilkash uslubi va ijodiy marketingi orqali brendni tez orada katta auditoriyaga tanita oldi.
2023-yilda T-Mobile Mint Mobile kompaniyasi Ka’ena Corporation’ni 1,35 milliard dollarga xarid qilgani e’lon qilindi. OAV xabarlariga ko‘ra, Reynolds 25 foizlik ulushdan 300 million dollar daromad ko‘rgan. U brendning marketing strategiyasida hozir ham faol ishtirok etmoqda.
Kim Kardashyan va KKW Beauty
Kim Kardashyan 2017-yilda KKW Beauty brendiga asos soldi. Uning mashhurligi va ijtimoiy tarmoqlardagi ta’siri brendga qisqa fursatda muvaffaqiyat olib keldi. Ayniqsa kontur qalamlar to‘plami tezda ommalashdi.
2020-yilda Coty Inc. kompaniyasi brendning 20 foiz ulushini 200 million dollarga xarid qildi. Kompaniyaning umumiy qiymati 1 milliard dollar deb baholandi.
2022-yilga kelib Kardashyan rebrending qilib, mahsulotlarini teri parvarishiga ixtisoslashgan SKKN by Kim brendiga aylantirdi. 2025-yil mart oyida esa uning SKIMS kompaniyasi SKKN’ning 100 foiz ulushini sotib olib, Coty’ni loyihadan to‘liq chiqarib yubordi.
Izoh (0)