O‘zbekistonda qurilish oynasidan foydalanish natijasida yuzaga keladigan chiqindilarni qayta ishlash va qayta tiklash xarajatlarini qoplash uchun utilizatsiya yig‘imi joriy etilishi mumkin. Oliy Majlisi Qonunchilik palatasining 1-iyuldagi majlisida bu ko‘zda tutilgan qonun loyihasi birinchi o‘qishda qabul qilindi.
Majlisda qayd etilishicha, qonun loyihasining asosiy maqsadi chiqindilarning fuqarolar hayoti va sog‘lig‘iga, atrof-muhitga zararli ta’sirining oldini olish, chiqindilar hosil bo‘lishini kamaytirish va ulardan oqilona foydalanilishini ta’minlashdan iborat. Shu sababli qurilish oynasidan foydalanish natijasida yuzaga keladigan chiqindilarni qayta ishlash va qayta ishlash xarajatlarini qoplash uchun utilizatsiya yig‘imi joriy etilmoqda.
Bu yig‘im oyna chiqindisini qayta ishlash va qayta ishlash xarajatlarini qoplash, ekologik xavfsizlikni ta’minlash va aholini sog‘lom muhitda yashashi uchun muhim mexanizm sifatida qaralmoqda.
Majlisda so‘zga chiqqan O‘zbekiston texnik jihatdan tartibga solish agentligi direktori Akmal Jumanazarovning ta’kidlashicha, ushbu qonun loyihasining asosiy maqsadi chiqindilarning fuqarolar hayoti va sog‘lig‘iga, atrof-muhitga ko‘rsatadigan zararli ta’sirining oldini olish, chiqindilarning hosil bo‘lishini kamaytirish va ulardan oqilona foydalanishni ta’minlashdan iborat.
Statistik maʼlumotlarga ko‘ra, shisha chiqindilarining O‘zbekistonda hosil bo‘lishi prognozi yiliga 408 ming tonnani tashkil etadi. O‘tgan yilda bor-yo‘g‘i 37 ming tonna shisha chiqindilari qayta ishlangan. Bu shisha chiqindilarining 9 foizini tashkil etadi va respublikada atrof-muhit muhitiga salbiy taʼsir ko‘rsatmoqda.
“Ushbu vaziyatning oldini olish maqsadida O‘zbekiston texnik jihatdan tartibga solish agentligi tomonidan mazkur qonun loyihasi tayyorlandi. Qonun loyihasi bilan qurilish oynasidan foydalanish natijasida yuzaga keladigan chiqindilarni qayta ishlash, infrastrukturani yaratish, qayta ishlashga sarflangan xarajatlarni qoplash uchun utilizatsiya yig‘imi joriy etilmoqda”, dedi Akmal Jumanazarov.
Qonun loyihasini tayyorlashda Rossiya, Belarus, Qirg‘iziston kabi davlatlarning tajribalari o‘rganib chiqilgan. Ushbu qonun loyihasi 5 ta aloqador vazirlik va idoralar bilan kelishilgan, Adliya vazirligidan huquqiy ekspertizadan o‘tkazilgan. Qonun loyihasi bilan “Tabiatni muhofaza qilish to‘g‘risida”gi va “Chiqindilar to‘g‘risida”gi qonunlarga tegishli o‘zgartirish va qo‘shimchalar kiritilmoqda.
Deputatlarning qayd etishicha, qonun loyihasi qurilish oynasi sifatini yaxshilash barobarida, mahalliy ishlab chiqarilayotgan qurilish oynasi eksporti hajmlarini yanada oshirish imkonini beradi.
Izoh (0)