Rossiyada 1-iyuldan boshlab Yagona biometrik tizimda ro‘yxatdan o‘tmagan chet el fuqarolari mobil aloqadan uziladi. Bu haqda Raqamli rivojlanish vazirligi xabar berdi.
2025-yildan boshlab xorijliklar aloqa operatori bilan faqat biometrik ma’lumotlarni topshirgan taqdirda shartnoma tuzishi mumkin. Ular o‘z nomlariga 10 tagacha SIM-karta rasmiylashtira oladi. Shartnomani avvalroq tuzganlar 1-iyulgacha biometrik ma’lumot topshirishi kerak edi.
Uch oydan ortiq vaqt davomida faol bo‘lmagan xorijliklarning telefon raqamlari darhol o‘chiriladi, deya ma’lum qildi vazirlik.
Faol raqamlar bosqichma-bosqich o‘chiriladi. Dastlab xorijliklar uchun xalqaro va shaharlararo aloqa xizmatlari bloklanadi. Bundan tashqari, ularning internetga kirish tezligi pasaytiriladi, 30 kundan keyin esa operatorlar xizmat ko‘rsatishni butunlay to‘xtatadi.
Vazirlikka ko‘ra, hozirgacha ikki milliondan ortiq xorijlik Yagona biometrik tizimda ro‘yxatdan o‘tgan va yangi tartib bo‘yicha aloqa shartnomalarini rasmiylashtirgan. Rossiya hukumati 2024-yilda xorijliklar tomonidan SIM-karta sotib olish qoidalarini kuchaytirish taklifi bilan chiqqandi. Raqamli texnologiyalar vazirligi bu “kulrang” SIM-kartalarga qarshi kurashish uchun zarurligini tushuntirgan.
Izoh (0)