Rossiya Qozon aviatsiya zavodida ishlab chiqarish quvvatini keskin oshira boshladi. Mazkur korxona strategik samolyotlar ishlab chiqaradigan yagona majmua hisoblanadi.
Yle nashrining sun’iy yo‘ldosh tasvirlariga tayanib xabar berishicha, korxona hududida umumiyi maydoni 19 ming kvadrat metrga yaqin yangi angarlar qurilmoqda. Ulardan eng yirigining uzunligi 320 metrgacha yetadi.
Nashr ma’lumotiga ko‘ra, 2025-yilda Qozon aviatsiya zavodi bazasiga o‘n minglab kvadrat metr yangi ishlab chiqarish maydoni qo‘shilgan. Bu uchun 90 milliard rubl (deyarli 1 milliard yevro) qiymatdagi yirik modernizatsiya loyihasi amalga oshirilgan. Jarayon 2026-yil oxiriga qadar yakunlanishi mumkin. Ishlab chiqarish quvvatini oshirish orqali urushda ko‘rilgan yo‘qotishlar o‘rnini qoplash va fuqaro aviatsiyasining ichki ehtiyojlarini qondirish reja qilingan bo‘lishi mumkin.
Korxona haqida
Qozon aviatsiya zavodi Rossiyaning “Tu-160M” va “Tu-160M2” strategik bombardimonchi samolyotlarini ishlab chiqara oladigan yagona korxonasi bo‘lib, mazkur samolyotlar Rossiya tomonidan Ukrainaga raketa hujumlarini amalga oshirishda faol qo‘llaniladi. Zavod shuningdek “Tu-22M3” bombardimonchilarini modernizatsiya qilish bilan shug‘ullanadi.
Biroq harbiy ekspertlarning ta’kidlashicha, modernizatsiya urinishlariga qaramay, korxonada ishlab chiqarish jarayonlari sekin bormoqda: 2024-yilda zavod Rossiya Aerokosmik kuchlariga atigi bir necha modernizatsiyalangan samolyot yetkazib bergan xolos.
Sanksiyalar sabab komponentlar yetishmovchiligi kuzatilmoqda. Qolaversa, ishchi kuchi tanqisligi ham mavjud. Fuqaro aviatsiyasi yo‘nalishida ham ishlar sekin boryapti: buyurtma qilingan 23 ta “Tu-214” samolyotidan atigi bittasi tayyorlangan.
Ukraina xavfsizlik xizmati tomonidan rus strategik aviatsiyasiga qarshi 1-iyun kuni olib borilgan “O‘rgimchak to‘ri” amaliyoti Qozon aviatsiya zavodini kengaytirish zaruratini oshirdi. Boisi Rossiya amaliyot natijasida ko‘plab strategik bombardimonchilaridan ayrildi.
Izoh (0)