AQSH prezidenti Donald Tramp rus hamkasbi Vladimir Putinning hududiy da’volari Ukraina chegarasidan tashqariga chiqishi mumkinligini istisno etmadi. Bu haqda u NATO sammiti doirasida o‘tkazilgan matbuot anjumanida ma’lum qildi.
Trampga Putinning hududiy ambitsiyalari Ukrainadan tashqariga ham yoyilishi mumkinligi haqidagi savol berildi. U “Menimcha, bu ehtimoldan xoli emas”, deya javob qaytardi.
Shuningdek, Tramp Putin urushdan chiqish va kelishuvga erishishni xohlayotganiga ishonch bildirdi. U yaqinda Putin unga qo‘ng‘iroq qilib Eron masalasida yordam taklif qilgani, ammo Tramp undan ko‘ra Rossiya bilan bog‘liq masalalarda yordam berishini afzal ko‘rganini aytdi.
Menimcha, u boshi berk ko‘chaga kirib qolgan. To‘g‘risi, men hayratdaman. Buni oson hal qilamiz, deb o‘ylagandim, dedi Tramp.
Tramp prezidentlik lavozimiga qaytganidan buyon besh oy ichida Ukrainadagi urushni tugatish bo‘yicha saylovoldi va’dasini nima uchun bajarmayotgani haqidagi savolga javob berdi. Unga ko‘ra, Putin “juda murakkab shaxs bo‘lib chiqqan”, Ukraina prezidenti Vladimir Zelenskiy bilan ham “muammolar yuzaga kelgan”. Tramp rus hamkasbi bilan yana gaplashmoqchi ekanini qo‘shimcha qildi, ammo qachonligini aniqlashtirmadi.
Zelenskiy bilan uchrashuv
Tramp 25-iyun kuni NATOning Gaagadagi sammitidan so‘ng Ukraina prezidenti Vladimir Zelenskiy bilan uchrashdi. Trampning aytishicha, ular Rossiya va Ukraina o‘rtasida o‘t ochishni to‘xtatish masalasini muhokama qilmagan. Faqat vaziyat qandayligini bilgan.
Uchrashuvdan shuni angladimki, Zelenskiy urushning tugashini istaydi. Men esa Putin bilan gaplashishim kerak. Uni yakunlay olamizmi – ko‘ramiz. O‘tgan haftada qariyb yetti ming ukrainalik va rossiyalik harbiy halok bo‘lgani haqiqatan dahshat, degan Tramp.
Zelenskiy esa Tramp bilan Ukraina shaharlarini himoya qilish uchun Patriot havo mudofaa tizimlarini xarid qilish va dronlarni birgalikda ishlab chiqarish imkoniyatini muhokama qilganini bildirgan. Shuningdek, u Trampga Istanbulda Rossiya delegatsiyasi bilan bo‘lib o‘tgan muzokaralar, asirlar va halok bo‘lganlar almashinuvi haqida ma’lumot bergan.
Biz jang maydonidagi vaziyatni muhokama qildik. Putin aniq g‘alaba qozonmaydi. Prezidentga yerda ro‘y berayotgan voqealar haqida faktlarni taqdim etdim, degan Zelenskiy.
Putin NATOga hujum qilishi mumkin
G‘arb harbiylari va siyosatchilari muntazam ravishda Putin NATOga qarshi hujum tayyorlayotgan bo‘lishi mumkinligi haqida ogohlantirib kelmoqda. Ularning taxminicha, bu 3–5 yil ichida sodir bo‘lishi mumkin, nishon esa Latviya, Litva yoki Estoniya bo‘ladi.
Putin allaqachon harbiy xarajatlarni yalpi ichki mahsulotning 7 foizigacha yetkazgan. Hozirda bu xarajatlar davlat byudjetining uchdan bir qismidan ko‘prog‘ini tashkil etadi. Bundan tashqari, Leningrad harbiy okrugida, Finlyandiya va Boltiqbo‘yi mamlakatlari bilan chegaralarda harbiy bazalar, qurol-yarog‘ omborlari, hamda o‘n minglab harbiylarni boshqarish uchun shtablar barpo etilmoqda.
Izoh (0)