Yevropa va AQSH Ukrainani qo‘llab-quvvatlash masalasida o‘zaro farqli pozitsiyalarga ega ekanligi aniq, biroq Yevropa Ittifoqi Amerikaga muhtoj va u bilan iloji boricha uzoqroq hamkorlik qilishni istaydi. Bu haqda Belgiya bosh vaziri Bart de Vever Yevropa Ittifoqi davlatlarining navbatdagi sammiti boshlanishidan oldin begran bayonotida ma`lum qildi.
“Ukraina masalasida endi yagona nuqtai nazarimiz yo‘qligi ayon. Menimcha, Yevropa bundan saboq chiqarishi, strategik jihatdan kuchliroq bo‘lishi lozim. Joylarda amerikaliklarning o‘rnini bosish uchun imkoniyatlarimiz yetarli emas. Shu bois biz ularga bog‘liqmiz. Umid qilamizki, ular biz bilan imkon qadar uzoqroq hamkorlik qilishadi. Ammo, afsuski, Yevropada Ukraina tarafdori pozitsiyasi Qo‘shma Shtatlarga qaraganda aniqroq ifodalangani ko‘rinib turibdi”, dedi u.
Shuningdek, Belgiya bosh vaziri Yevropa Ittifoqi sammitida Ukraina tarafdori pozitsiyasini namoyish etish zarurligini ta’kidlagan. Uning aytishicha, NATO sammiti bu borada muvaffaqiyatsizlikka uchragan.
“NATO sammiti vaqtida Ukraina u yerda bo‘lgani, ammo muzokaralar stolida o‘tirmaganidan afsusdaman. Zelenskiy sammitning norasmiy qismida ishtirok etdi, biroq uchrashuv paytida emas. Menimcha, bu haqiqatan ham achinarlı hol. Bugun Yevropa biz hali ham Ukraina bilan to‘liq ekanligimizni ko‘rsatishi kerak. Ukraina tarafdori bo‘lmagan Vengriyadan tashqari 26 ta davlat, biz Ukraina xalqini qo‘llab-quvvatlayotganimizni namoyon etishimiz lozim”, dedi Belgiya bosh vaziri.
Bundan avval Polshaning yangi saylangan prezidenti Karol Navrotskiy Ukrainaning Yevropa Ittifoqiga qo‘shilishiga qarshi chiqqandi. Vengriya bosh vaziri Viktor Orban Facebook’dagi sahifasida Ukrainani Yevropa Ittifoqi va NATOga qabul qilish mumkin emas, chunki bu G‘arb davlatlarining Rossiya bilan urushga kirishishiga olib kelishini bildirgandi.
Izoh (0)