NATO a’zolari Gaagadagi sammitda 2035-yilga borib mudofaa xarajatlarini 5 foizgacha oshirishga kelishib oldi. Sammitda 2019-yildan beri endi ishtirok etayotgan AQSH prezidenti Donald Tramp bu qarorni “katta g‘alaba” deb atadi.
AQSH prezidenti Gaagadagi NATO sammitida qabul qilingan qarorni “Yevropa va G‘arb sivilizatsiyasi uchun katta g‘alaba” deb ta’rifladi. Qo‘shma bayonotda alyans a’zolari “xavfsizlikka chuqur tahdidlar, jumladan, Rossiya tahdidi va terrorizm”ga qarshi birlashganini e’lon qilgan.
Yetakchilar alyansning bir a’zosiga hujum qilingan taqdirda, NATOning barcha a’zolari bunga tegishli javob qaytarishini yana bir bor ta’kidlab o‘tgan.
“Xavfsizligimiz xavf ostida qolsa, hech kim salohiyat va qat’iyatimizga shubha qilmasin. Endilikda alyans yanada kuchli, adolatli ittifoqqa aylanib bormoqda”, dedi NATO bosh kotibi Mark Ryutte.
Gaaga sammiti bir qator yetakchilar tomonidan tarixiy deb ta’riflanmoqda. Ryutte 25-iyun kuni qabul qilingan qarorlar tinchlikka intilish bilan birga, Ukrainani qo‘llab-quvvatlashni davom ettirishini bildirgan.
Kelishuvga ko‘ra, alyansga a’zo davlatlar kelasi 10 yil davomida mudofaa xarajatlarini 5 foizgacha oshiradi. 2035-yilga borib har bir a’zo davlat yalpi ichki mahsulotining kamida 3,5 foizini asosiy mudofaa xarajatlariga, shuningdek, xavfsizlik infratuzilmasiga tegishli investitsiyalarga esa eng ko‘pi bilan 1,5 foizini yo‘naltiradi.
AQSH prezidenti 2019-yildan beri birinchi marta NATO sammitida ishtirok etmoqda. U xarajatlarning oshishi “barcha uchun katta g‘alaba” bo‘lishini aytgan. Tramp sammit doirasida Ukraina prezidenti Vladimir Zelenskiy bilan ham muzokaralar o‘tkazgan. Matbuot anjumanida Tramp Ukrainada o‘t ochishni to‘xtatishga erishish u kutganidan “qiyinroq” bo‘layotganini ta’kidlagan. Shuningdek, Ukrainaga qo‘shimcha havo hujumidan mudofaa tizimlarini yetkazib berish taklifini ham o‘rtaga tashlangan.
Sammit so‘ngida NATOga a’zo davlatlar Ukrainani qo‘llab-quvvatlash majburiyatini olganini ta’kidlab, Kiyevning mudofaasi va mudofaa sanoatiga yordam berilishini ham qo‘shimcha qilgan.
Izoh (0)