Turkiya tashqi ishlar vaziri Xoqon Fidan mamlakat Rossiya va Ukraina o‘rtasidagi tinchlik muzokaralarining uchinchi raundini Istanbulda o‘tkazishga tayyorligini ma’lum qildi.
Fidan o‘tkazilgan muzokaralar doirasida tomonlar qabul qilgan qarorlarni amalga oshirish muhimligini ta’kidlagan.
“Uchinchi bosqichni o‘tkazishning muhimligiga guvoh bo‘lib turibmiz. Rossiyaliklar ham bu masala bo‘yicha bayonot berdi. Biz buni qabul qilishga va vositachilik rolini o‘ynashga tayyormiz. Keling, urushni tugatishga hissa qo‘shaylik. Bu urushdagi azob-uqubatlarni ma’lum darajada yengillashtiraylik, masalan, asirlar, jasadlar, yaradorlar va bolalarni almashaylik”, dedi vazir.
Rossiyaning yangi muzokaralarga tayyorligi aytilganidan keyin Ukrainaning bunga munosabati qanday bo‘lishi haqidagi savolga Fidan “tomonlar avvalgi uchrashuvda o‘z pozitsiyalari haqida bir-birini xabardor qilgan”ini bildirgan.
Vazirning ta’kidlashicha, tomonlar o‘t ochishni to‘xtatishni ta’minlash bo‘yicha o‘z pozitsiyalari va shartlari haqida bir-birlarini allaqachon xabardor qilgan. Ammo masala bir necha uchrashuvda hal qilinishi mumkin bo‘lgan darajada oddiy emasligi aytilgan.
“Nafrat bo‘lgan joyda mazmunli va samarali uchrashuvlar o‘tkazish imkoniyatini yaratish muhim. Bularning barchasini tashkil etish va o‘tkazish Turkiya va prezidentimiz uchun diplomatiyaning muhim qismi sanaladi”, deb qo‘shimcha qilgan Fidan.
Izoh (0)