Toshkent viloyatining Qibray tumanida 1,9 mlrd so‘mlik tabiiy gazdan noqonuniy foydalangan tadbirkorlar aniqlandi, deb xabar berdi “Hududgaztaʼminot” AJ.
Maʼlum qilinishicha, Qibray tumanining “Salor” mahallasida joylashgan noturar bino xatlovdan o‘tkazilganda, fuqaro Sh.A. kafel ishlab chiqarish sexi tashkil etib, loyiha-texnik hujjatlarisiz tabiiy gaz tarmog‘iga noqonuniy ulanib olgani maʼlum bo‘ldi.
“E-maʼmuriy” dasturi orqali hisob-kitob qilinganida gaz taʼminoti korxonasiga 955 mln 583 ming so‘m miqdorida zarar yetkazilgani aniqlandi.
Shuningdek, Oqqo‘rg‘on tumani “Usta Nurmat” MFYda joylashgan “R.Q.” MCHJga qarashli novvoyxonada gaz tarmog‘iga tegishli loyiha-texnik hujjatlarisiz ulangani aniqlandi.
Holat bo‘yicha 946 mln 080 ming so‘mlik zarar qayta hisob-kitob qilindi.
Aniqlangan holatlar bo‘yicha hujjatlar rasmiylashtirilib, tegishli tartibda huquqni muhofaza qiluvchi idora vakillariga topshirildi.
Bunday holatlar soni ortib bormoqda
Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi.
- Qoraqalpog‘istonning uchta hududida 845 mln so‘mlik gazdan noqonuniy foydalanildi.
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi.
- Uchta viloyatda qariyb yarim mlrd so‘mlik gazdan noqonuniy foydalanildi.
2025-yil may oyida o‘tkazilgan tekshiruvlar natijasida iste’molchilar tomonidan energiya resurslaridan noqonuniy foydalanilgan 229 ta holat aniqlanib, tizimga 94 milliard 887 million so‘mlik zarar yetkazilgani ma’lum bo‘ldi.
Jumladan, noqonuniy foydalanishlar natijasida:
- 35,6 million kVt soat elektr energiyasi (taxminan 57,9 milliard so‘m) va
- 13,2 million metr kub tabiiy gaz (taxminan 36,9 milliard so‘m) talon-toroj qilingan.
Nazorat tadbirlari yakuniga ko‘ra, energiya resurslaridan foydalanish qoidalarini buzgan iste’molchilar bo‘yicha 448 ta ma’muriy ish rasmiylashtirildi. Belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi.
Izoh (0)