Urganch shahar prokuraturasi tergovchisiga nisbatan jinoyat ishi qo‘zg‘atildi. Bu haqda DXX matbuot xizmati xabar berdi.
Ma’lum qilinishicha, Urganch shahar prokuraturasi katta tergovchisi mansab mavqeyidan foydalanib, Bosh prokuratura huzuridagi departamentning viloyat boshqarmasi tomonidan mahalliy fuqaroga nisbatan qo‘zg‘atilib, o‘zining hamkasbi tomonidan dastlabki tergov harakatlari olib borilayotgan jinoyat ishini ayblov xulosasi bilan sudga yuborilmasdan, tergovda tugatib berish evaziga 3000 AQSH dollari talab qilgan.
Natijada katta tergovchi 2025-yilning 16—28-may oralig‘ida 1000 AQSH dollari, 10 mln so‘m, qiymati 1000 AQSH dollariga teng bo‘lgan 1 dona seyf va 1 million 300 ming so‘mlik 1 dona ish stoli jamlanmasini firibgarlik yo‘li bilan qo‘lga kiritgan.
Ammo fuqaro o‘ziga nisbatan Jinoyat kodeksining 25,168 moddasi 1-qismi va 28,211-moddasi 1-qismi bilan qo‘zg‘atilgan jinoyat ishi dastlabki tergovda tugatilmasdan, ayblov xulosasi bilan sudga yuborilganini bilgach, tergovchidan muqaddam berilgan pul mablag‘lari va ashyolarni qaytarib berishini talab qilgan.
Shundan so‘ng tergovchi 1000 AQSH dollari, qiymati 1000 AQSH dollariga teng bo‘lgan 1 dona seyf va 1 million 300 ming so‘mlik 1 dona ish stoli jamlanmasini fuqaroga qaytarib bergan vaqtida DXXning Xorazm viloyati bo‘yicha boshqarmasi hamda viloyat prokuraturasi xodimlari tomonidan ashyoviy dalillar bilan ushlangan.
Hozirda tergovchiga nisbatan jinoyat ishi qo‘zg‘atilib, qamoq ehtiyot chorasi qo‘llandi.
2025-yilning boshlarida Toshkent shahrining Olmazor tumani prokuraturasi tergovchisi 20 ming AQSH dollari miqdorida pora olgan vaqtida ushlangandi. Samarqand viloyati IIB katta tezkor xodimi noqonuniy ravishda 10 ming dollar olgan vaqtida qo‘lga tushgandi.
Izoh (0)