Davlat kadastrlari palatasi Gurlan tumani filiali boshlig‘i hamda “Farg‘ona suv taʼminoti” AJ Marg‘ilon shahar filiali operatori pora bilan qo‘lga olindi. Bu haqda IIV matbuot xizmati xabar berdi.
O‘tkazilgan tezkor tadbirda Davlat kadastrlari palatasi Xorazm viloyati boshqarmasi, Gurlan tumani filiali boshlig‘i fuqaroga noturar ko‘chmas mulkni turar-joy toifasiga o‘tkazishda ijobiy xulosa berish va viloyat kadastrlar palatasidan o‘tkazishda yordam berishni vaʼda qilgan.
Buning evaziga 500 dollarni pora tariqasida olgan vaqtida ushlandi.
Shuningdek, “Farg‘ona suv taʼminoti” AJ Marg‘ilon shahar filialida aholi operatori qo‘lga olindi. U aslida qarzdorligi bo‘lmagan, Farg‘ona shahar, Kelgeli mavzesidagi xonadonni 9 mln 619 ming so‘m qarzdorligi mavjudligini aytgan.
Suv hisoblagichini almashtirish va qarzdorligini yo‘qotib berish evaziga 9 mln so‘m olgan vaqtida ushlandi.
Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
Qarzdorlikni yo‘q qilib beruvchi “uddaburon”lar
Aprel oyida Toshkent shahri, Andijon va Samarqand viloyatlarida qarzdorlikni yo‘q qilib berish uchun pul olganlar ushlangan edi.
May oyida ham Andijon va Jizzaxda gaz va “svet”dan noqonuniy foydalanish holatlarini rasmiylashtirmaslikni vaʼda qilgan shaxslar ushlangan.
Shuningdek, iyul oyida Samarqandda tuman elektr ta’minoti korxonasi sobiq xodimi tadbirkorning 14 ming dollarini qo‘lga kiritmoqchi bo‘lgani haqida xabar berilgandi.
Izoh (0)