Qo‘shni davlatlardan kontrabanda yo‘li bilan olib kelingan 8,2 kg narkotik moddalar to‘xtatib qolindi.
Surxondaryo viloyatining Uzun tumanida yashovchi, 1995-y.t. shaxs Tojikistondan kontrabanda yo‘li bilan olib kelingan 896 gramm gashish moddasini kelgusida sotish maqsadida Denovdagi xufiya joyga yashirish uchun olib borayotgan vaqtida qo‘lga olindi.
Shuningdek, uning yashash xonadonidan ham 2 kg 260 gramm opiy moddasi tegishli tartibda rasmiylashtirib olindi.
Shu bilan birga, Namangan shahrida yashovchi, 1987-y.t., muqaddam sudlangan fuqaro boshqaruvidagi avtomashina to‘xtatilib, ko‘zdan kechirildi. Avtomashina salon qismida 2 kg 990 gramm gashish moddasi borligi maʼlum bo‘ldi.
Tergovga qadar tekshiruv davomida aniqlanishicha, Qirg‘iziston fuqarosi tomonidan aylanma yo‘llar orqali Yangiqo‘rg‘on tumani hududiga yetkazib berilgan mazkur giyohvandlik vositasi Namangan shahrida sotilishi rejalashtirilgan.
Bundan tashqari, Marg‘ilonda yashovchi, 1973-y.t. va Toshloqda istiqomat qiluvchi, 1971-y.t. ikki nafar fuqaro o‘zaro jinoiy til biriktirib, Tojikistondan olib kelingan 487 gramm gashish moddasini 5000 dollarga sotgan vaqtlarida qo‘lga olindi.
Toshloq tumanilik fuqaroning yashash xonadonidan 599 gramm gashish moddasi protsessual tartibda rasmiylashtirib olindi.
Yana bir holatda esa Urgut tumanida yashovchi, 1983-y.t., muqaddam bir necha marotaba sudlangan shaxs Tojikistondan kontrabanda yo‘li bilan olib kelingan 982 gramm opiy moddasini o‘zining jinoiy sherigi bo‘lgan, 1991-y.t. fuqaro bilan birga xaridorga 8000 dollarga sotgan vaqtlarida ushlandi.
Hozirda barcha holatlar yuzasidan mazkur shaxslarga nisbatan jinoyat ishlari qo‘zg‘atilib, qamoq ehtiyot chorasi qo‘llanildi.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)