Aktrisa Fotima Rejametova o‘zini osib qo‘ygan qo‘shnisining ishi yuzasidan murojaat bilan chiqdi. Bu haqda “Millar” dasturida xabar berildi.
Xabarda aytilishicha, 2024-yilning sentyabr oyida turmushga chiqqan qizning oradan ikki oy o‘tgach, kuyovning xonadonidan o‘ligi chiqqan. Aktrisa Fotima Rejametova qo‘shnilari qayerga murojaat qilishni bilmayotganini aytib, ichki ishlar organlariga iltimos bilan chiqdi.
“Biz qo‘shni bo‘lamiz, Fotima bilan Husan egizak. Juda mehrim tushgan edi. Oynamizdan oynasi ko‘rinadi. Qarasam tobut. O‘g‘lim borib keldi-da, Fotima olamdan o‘tibdi, dedi.
Yordam beringlar, deb murojaat qildim. Iltimos qilaman, javob beruvchi organlarimiz berilgan arizalariga sal eʼtiborli bo‘lsin. Fotimani jinniga chiqarib qo‘yishdi. Biz uni bilamiz qanaqa qiz bo‘lganini. Arqon ham, rasm ham yo‘q”, deydi u.
Marhumaning otasi ham intervyu berib, barcha unga qizi vasvasaga tushib qolgani sababli joniga qasd qilganini aytganini bildirdi.
“Qizimni turmushga berganimdan keyin hech qanday shikoyat bilan kelmagan. Menga o‘zini osib o‘ldirganini aytishdi. Borgunimcha hech kim qizimga tegmasligini aytdim. Borsam, yotqizib qo‘yishgan ekan. O‘sha yerda o‘zimni yo‘qotdim. Qizingiz vasvasaga tushgan, deb ichimni yondiradigan gaplarni aytishdi. Men bunga ishonmayman. Qabrni ochaman, oxirigacha boraman. Sababini bilmaguncha tinchimayman deganman”, deydi otasi.
Bundan tashqari, marhumaning qaynonasi ham voqeaga izoh berdi:
“Fotima qizim biz bilan 70 kun yashadi. Yaxshi edi. Uni qiz sifatida ko‘rdim, kelin emas. Biz uchun qadrli inson edi. Hammamiz unga o‘rganib qolgan edik.
Birinchi marta o‘zini osgan odamni ko‘rishim, qo‘rqib ketdim. Ichki ishlar xodimlarini chaqirdim, ular arqondan yechib olishdi”.
Joniga qasd qilganlar
Toshkent viloyatida 32 yoshli ayol o‘zini kanalga tashlab, vafot etgandi. Navoiyda esa 14 yoshli o‘quvchi qiz o‘zini osib vafot etgani haqida xabar berilgandi.
Samarqand shahrida 19 yoshli qiz o‘zini 9-qavatdan tashlab joniga qasd qilgani haqida xabar berilgan edi. Hozirda marhumaning barcha oila a’zolari tergovga jalb qilingan. Onasi marhuma bir qo‘ng‘iroqdan so‘ng birdaniga o‘zini tashlab yuborganini bildirgan.
Shuningdek, 2025-yil yanvarida Qo‘qondagi talabalar turar joyida talaba qiz o‘z joniga qasd qilgani haqida xabar berilgan edi. Prokuratura surishtiruv natijalariga ko‘ra, mazkur holat shaxsiy muammolar sababli sodir bo‘lgani aniqlangan va jinoyat ishi qo‘zg‘atish rad etilgan.
Yana bir holatda Toshkentdagi xonadonlardan birida fuqaro oshxonada gaz plitasini yoqish orqali o‘z joniga qasd qilishga uringan. Natijada gaz havo aralashmasi chaqnashi sodir bo‘lib yong‘in kelib chiqqandan so‘ng ushbu fuqaro 9-qavatdan o‘zini tashlash orqali halok bo‘lgani aniqlangan.
Izoh (0)