Farg‘ona viloyatida “Qoradori-2025” tezkor-profilaktik tadbirlari davom ettirilmoqda, deb xabar berdi IIV.
Maʼlum qilinishicha, Dang‘ara tumanida o‘tkazilgan tezkor tadbirda fuqaroning yashash xonadoni ko‘zdan kechirildi. Xonadon tomorqasida 55 ming tupdan ortiq ko‘knori va 40 dan ortiq nasha o‘simligini o‘stirayotgani aniqlandi.
Shuningdek, uy boloxonasida 600 grammdan ortiq quritilgan nasha giyohvandlik moddasini saqlayotgani fosh etildi.
Olingan tezkor maʼlumotga asosan, Farg‘ona shahrida o‘tkazilgan tadbir davomida “Tabassum” mahallasida yashovchi, 1992-yilda tug‘ilgan shaxs o‘z xonadonida 10 kg 960 gramm “opiy”, 10 gramm “gashish” giyohvandlik moddasini sotish maqsadida saqlab kelayotgani aniqlandi.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek—qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)