Agar o‘t ochish to‘xtatilmasa va tomonlar kelishuvga erishmasa, Ukraina jahon xaritasidan yo‘qolib ketishi mumkin. Bu haqda AQSH sobiq prezidenti Donald Tramp davrida mudofaa vazirining maslahatchisi bo‘lgan iste’fodagi polkovnik Duglas Makgregor Sky News Australia telekanaliga bergan intervyusida gapirdi.
“Bu aslini olganda muvaffaqiyatsiz davlat, u dunyo xaritasidan butunlay o‘chib ketishi ham mumkin”, — dedi Makgregor .
Uning so‘zlariga ko‘ra, Avstraliya o‘t ochishni to‘xtatishni talab qilishi kerak, chunki AQSHda “buni hech kim qilmaydi”.
“Men Berlin, Parij va Londondagi odamlardan ular bu g‘oyani – o‘t ochishni to‘xtatish va qandaydir kelishuvga erishish g‘oyasini qo‘llab-quvvatlayotgani haqida eshityapman. Chunki bizni oxirgi ukrainalik qolguncha jang qilishga qurbimiz yetmaydi”, — dedi AQSH mudofaa vazirining sobiq maslahatchisi.
Iyun oyi o‘rtalarida Rossiyaning sobiq prezidenti, Rossiya Federatsiyasi Xavfsizlik kengashi rahbari o‘rinbosari Dmitriy Medvedev Telegram kanalidagi postida ikki yildan keyin Ukrainaning mavjud bo‘lishini shubha ostiga olgandi.
“Ikki yildan keyin Ukraina dunyo xaritasida umuman mavjud bo‘ladi, deb kim aytdi?” — degan u.
Medvedev nima sababdan ikki yildan keyin Ukraina jahon xaritasida yo‘q bo‘lishi mumkinligini aytmagan.