Siyosatshunos Hamid Sodiq fikricha, navbatdagi jahon urushi yuz berishi uchun ayrim alomatlar mavjud.
Hamid Sodiq YouTubeʼdagi “Online king” loyihasiga intervyu berdi. Suhbatda siyosatshunosdan ko‘plab mavzular, jumladan, uchinchi jahon urushi to‘g‘risida so‘raldi.
“Uchinchi jahon urushi alomatlari bor. Chunki Ikkinchi jahon urushi boshlanishidan oldin ham dunyoda buyuk depressiya vujudga kelgan va AQSH tariflar eʼlon qilgan. Hozir ham qandaydir depressiv holatdamiz”, dedi mutaxassis.
Hamid Sodiq Amerika prezidenti Donald Tramp ustidan impichment bo‘ladimi, degan savolga ham javob qaytardi.
“Qani endi siyosiy institutlar Trampdan ustun kelsa, yaxshi bo‘lardi. Lekin Tramp g‘alaba qozonadigan bo‘lsa, butun dunyo jiddiy voqea-hodisalarga tayyor turishi kerak. Trampning yonida turganlar, Vens deysizmi yoki boshqasimi, prezident bo‘lsa, holat karrasiga yomonlashadi”, dedi siyosatshunos.
Hamid Sodiq suhbat davomida Donald Trampni “omadsiz tujjor” deya taʼrifladi.
Rossiya Ukrainaga bostirib kirgandan beri (2022-yil 24-fevral) qator dunyo yetakchilari va taniqli shaxslar navbatdagi jahon urushi ro‘y berishidan ogohlantira boshlagan.
Avvalroq Rossiyaning sobiq prezidenti, hozirda Xavfsizlik kengashi raisi o‘rinbosari Dmitriy Medvedev dunyo uchinchi jahon urushi yoqasida turganini aytgandi.
Vengriya tashqi ishlar vaziri Peter Siyarto “Ukrainaning NATOga qabul qilinishi uchinchi jahon urushi boshlanishini anglatadi”, deya bayonot bergan.
Izoh (0)