Qo‘yliq bozorida bo‘g‘ma ilonlarni noqonuniy sotilayotgani ma’lum bo‘ldi. Bu haqda Ekologiya vazirligi xabar berdi.
Keltirilishicha, Toshkent shahar Ekologiya boshqarmasi Yashnobod tuman bo‘limi, Milliy gvardiya, Ichki ishlar vazirligi hamda ommaviy axborot vositalari bilan birga “Yangiobod” va “Qo‘yliq” bozorlarida navbatdagi reyd tadbirlari o‘tkazildi.
Reyd davomida “Qo‘yliq” bozori hududida 5 ta sharq bo‘g‘ma iloni noqonuniy sotilayotgani aniqlandi. Ilonlar Toshkent hayvonot bog‘iga topshirildi. Huquqbuzarga nisbatan Ma’muriy javobgarlik to‘g‘risidagi kodeksning 92-moddasi bilan ma’muriy bayonnoma rasmiylashtirildi hamda bazaviy hisoblash miqdorining 10 baravari — 3 million 750 ming so‘m miqdorida jarima belgilandi.
Shuningdek, reyd davomida noqonuniy sotilayotgan boshqa hayvon va qushlar ham aniqlanib, tabiatga qo‘yib yuborildi. Huquqbuzarlarga nisbatan tegishli tartibda choralar belgilandi.
Reyd tadbirlari davom ettirilmoqda.
Kuni kecha Toshkentdagi bozorda ilonning boshini uzib, uni so‘ygan qizga chora ko‘rilgan edi.
Buxoroda erkak echkiemar og‘ziga nos solib, shafqatsiz munosabatda bo‘lgandi. Toshkentdagi bog‘da esa odamlar orasida bahaybat ilon o‘rmalab ketayotgani aks etgan video yuzasidan izoh berilgandi.
Xorazm viloyatining Urganch shahrida noqonuniy saqlanayotgan sher hayvonot bog‘iga topshirilgan edi. Shuningdek, Toshkent shahar Olmazor tumanida fuqaro o‘z uyida Qizil kitobga kiritilgan qushlarni saqlab kelayotgani aniqlangandi.
Izoh (0)