Ilon Mask 11-iyun kuni o‘tgan haftada ijtimoiy tarmoqlarda AQSH prezidenti Donald Tramp bilan bo‘lgan janjal davomida u haqida yozgan ba’zi postlaridan afsusda ekanini aytdi. Bu haqda Euronews xabar berdi.
“O‘tgan hafta prezident haqidagi ba’zi postlarimdan afsusdaman. Bu haddan oshish edi”, dedi milliarder o‘zining X platformasida.
U aynan qaysi postlar haqida gapirayotganini ma’lum qilmagan. X’dagi bir qator postlarida Mask Trampning savdo tariflari tanazzulga olib kelishini aytib, uni impichmentga chaqirgandi. Oq uy bu da’volarni puchga chiqardi. O‘shandan beri Mask ba’zi postlarni, jumladan, impichmentga chaqiruvchi postni o‘chirib tashlagan.
Tramp, o‘z navbatida, Maskning “aqldan ozganini” aytib, xarajatlarni tejash chorasi sifatida milliarderning federal shartnomalarini, shu jumladan SpaceX va Tesla bilan shartnomalarini bekor qilish bilan tahdid qilgan.
9-iyun kuni Tramp jurnalistlarga SpaceX kompaniyasiga tegishli Starlink sun’iy yo‘ldosh internet-kompaniyasini tugatish rejasi yo‘qligini bildirgan.
“Biz yaxshi munosabatda edik va unga faqat yaxshilik tilayman”, degan Tramp.
Mask Trampga 2024-yilda qayta saylanishiga yordam berish uchun katta moliyaviy yordam ko‘rsatgandi. Saylov davomida taxminan 277 million dollar sarflagani aytilgan. Tramp qayta saylanganidan so‘ng, Mask hukumat xarajatlarini kamaytirish va samaradorlikni oshirish maqsadida “Hukumat samaradorligi bo‘limi” yoki DOGE deb ataladigan bo‘limga rahbarlik qilgan.
Mask may oyi oxirida bu ma’muriyatni biznesga qaytish istagi va DOGE’dagi xarajatlarni kamaytirish bo‘yicha sa’y-harakatlaridan hafsalasi pir bo‘lgani uchun tark etgandi.
Izoh (0)