Қўйлиқ бозорида бўғма илонларни ноқонуний сотилаётгани маълум бўлди. Бу ҳақда Экология вазирлиги хабар берди.
Келтирилишича, Тошкент шаҳар Экология бошқармаси Яшнобод туман бўлими, Миллий гвардия, Ички ишлар вазирлиги ҳамда оммавий ахборот воситалари билан бирга “Янгиобод” ва “Қўйлиқ” бозорларида навбатдаги рейд тадбирлари ўтказилди.
Рейд давомида “Қўйлиқ” бозори ҳудудида 5 та шарқ бўғма илони ноқонуний сотилаётгани аниқланди. Илонлар Тошкент ҳайвонот боғига топширилди. Ҳуқуқбузарга нисбатан Маъмурий жавобгарлик тўғрисидаги кодекснинг 92-моддаси билан маъмурий баённома расмийлаштирилди ҳамда базавий ҳисоблаш миқдорининг 10 баравари — 3 миллион 750 минг сўм миқдорида жарима белгиланди.
Шунингдек, рейд давомида ноқонуний сотилаётган бошқа ҳайвон ва қушлар ҳам аниқланиб, табиатга қўйиб юборилди. Ҳуқуқбузарларга нисбатан тегишли тартибда чоралар белгиланди.
Рейд тадбирлари давом эттирилмоқда.
Куни кеча Тошкентдаги бозорда илоннинг бошини узиб, уни сўйган қизга чора кўрилган эди.
Бухорода эркак эчкиэмар оғзига нос солиб, шафқатсиз муносабатда бўлганди. Тошкентдаги боғда эса одамлар орасида баҳайбат илон ўрмалаб кетаётгани акс этган видео юзасидан изоҳ берилганди.
Хоразм вилоятининг Урганч шаҳрида ноқонуний сақланаётган шер ҳайвонот боғига топширилган эди. Шунингдек, Тошкент шаҳар Олмазор туманида фуқаро ўз уйида Қизил китобга киритилган қушларни сақлаб келаётгани аниқланганди.
Изоҳ (0)